სტამბოლში რუსეთისა და უკრაინის დელეგაციებს შორის მოლაპარაკებები დასრულდა. ამის შესახებ რუსული მედია წერს.

მათვე ცნობით, შეხვედრა ჩირაგანის სასახლეში გაიმართა და ერთ საათზე მეტხანს გაგრძელდა.

წყაროების ცნობით, დელეგაციების შემდეგ შეხვედრასთან დაკავშირებით კონკრეტული შეთანხმებები ჯერ არ არსებობს. მხარეებმა პატიმრების გაცვლაზე იმსჯელეს, შედეგები კი ოფიციალურად გამოცხადდება.

თურქეთის საგარეო საქმეთა მინისტრმა ჰაკან ფიდანმა მოლაპარაკებების დასაწყისში განაცხადა, რომ მხარეები განიხილავენ ცეცხლის შეწყვეტის პერსპექტივებს, მათ პოზიციებს, ჰუმანიტარულ საკითხებს, მათ შორის დაკავებულთა გაცვლას და ლიდერების დონეზე შესაძლო შეხვედრისთვის მზადებას.

მისი შესავალი სიტყვის შემდეგ, შეხვედრა დახურულ კარს მიღმა გაიმართა.

რუსეთსა და უკრაინას შორის პირდაპირი მოლაპარაკებები სამ წელზე მეტი ხნის შესვენების შემდეგ, 16 მაისს განახლდა. პირველი შეხვედრა დაახლოებით ორ საათს გაგრძელდა. ცეცხლის შეწყვეტის მიზნით მუშაობის გაგრძელების განზრახვის გარდა, მხარეები შეთანხმდნენ პატიმრების გაცვლაზე "1000 1000-ზე" ფორმულით. ეს შეთანხმება შესრულდა.