Nvidia-მ (NVDA) გასულ ოთხშაბათს მოსალოდნელზე მაღალი შემოსავლებისა და მოგების შესახებ ინფორმაცია გაავრცელა, რასაც აქციების ფასის 6%-იანი ზრდა მოჰყვა. კომპანიის ცნობით, მისმა მონაცემთა ცენტრების მიმართულებამ 73%-იანი ზრდა აჩვენა.

მიმდინარე წლის პირველის კვარტლის მოლოდინებისა და რეალური შედეგების შედარება ასე გამოიყურება:

• ერთ აქციაზე მოგება: 96 ცენტი, მოსალოდნელი 93 ცენტის წინააღმდეგ;
• შემოსავალი: 44.06 მილიარდი დოლარი, მოსალოდნელი 43.31 მილიარდის პირისპირ.

Nvidia-მ განაცხადა, რომ მიმდინარე კვარტალში გაყიდვებიდან დაახლოებით 45 მილიარდ დოლარს ელოდება, მაშინ როდესაც LSEG-ის პროგნოზით ეს მაჩვენებელი 45.9 მილიარდი დოლარია. კომპანიამ ისიც აღნიშნა, რომ მისი პროგნოზი დაახლოებით 8 მილიარდით მეტი იქნებოდა, რომ არა ჩინეთისთვის განკუთვნილი ექსპორტის შეზღუდვა.

აშშ-ის ხელისუფლებამ კომპანიას აცნობა, რომ მის მიერ ადრე ჩაშვებული H20 პროცესორის ექსპორტისთვის ჩინეთში ლიცენზია გახდებოდა საჭირო. Nvidia-მ თქვა, რომ ჭარბი მარაგების შექმნისთვის 4.5 მილიარდი დოლარის დანახარჯი უკვე გაწეული აქვს და აღნიშნა, რომ დამატებით 2.5 მილიარდი დოლარის პროდუქციის გაყიდვას მოახერხებდა, რომ არა შეზღუდვები.

კომპანიის აღმასრულებელმა დირექტორმა ჯენსენ ჰუანგმა განაცხადა, რომ ჩინეთში ხელოვნური ინტელექტის ჩიპების 50 მილიარდიანი ბაზარი "ფაქტობრივად დახურულია აშშ-ის ინდუსტრიისთვის."

არსებული მდგომარეობის მიუხედავად, Nvidia-ს ანგარიში აჩვენებს, რომ კომპანია ჯიუტად აგრძელებს ზრდას — ეს კი, უმთავრესად, ხელოვნური ინტელექტის ჩიპებზე მაღალი მოთხოვნით არის გამოწვეული. როგორც ცნობილია, ეს ჩიპები ისეთი აპლიკაციების შესაქმნელად გამოიყენება, როგორიცაა — OpenAI, ChatGPT და სხვები.

Nvidia-ს ანგარიში აჩვენებს, რომ კომპანიის წმინდა მოგება 26%-ით გაიზარდა და 18.8 მილიარდი დოლარი შეადგინა. შემოსავლები კი, როგორც უკვე აღინიშნა, წლიურად 69%-ით გაიზარდა და 44.06 მილიარდ დოლარს მიღწია. მონაცემთა ცენტრების გაყიდვები (AI ჩიპები და მათთან დაკავშირებული კომპონენტები) წლიურად 73%-ით არის გაზრდილი და 39 მილიარდ დოლარს აჭარბებს, რაც კომპანიის მთლიანი შემოსავლის 88%-ია.

Nvidia-ს სათამაშო განყოფილებამ, რომელიც 3D თამაშებისთვის განკუთვნილ ჩიპებს მოიცავს, შემოსავალი წლიურად 42%-ით გაზარდა და 3.8 მილიარდი დოლარი შეადგინა. როგორც ცნობილია, კომპანია თავდაპირველად ძირითადად სწორედ სათამაშო სექტორისთვის განკუთვნილ ჩიპებს აწარმოებდა, სანამ მის ჩიპებს ხელოვნური ინტელექტის ბუმი დაეწეოდა.

ანგარიშის მიხედვით, ავტომობილებისა და რობოტიკის სექციამ 72%-იანი ზრდა აჩვენა და 567 მილიონი დოლარის პროდუქცია გაყიდა. კომპანიამ ეს ზრდა თვითმართვადი მანქანებისთვის განკუთვნილი ჩიპებისა და პროგრამული უზრუნველყოფის გაზრდილ გაყიდვებს მიაწერა.

არსებული მდგომარეობით Nvidia-ს (NVDA) ერთ აქციის შეძენა 134.91 დოლარად არის შესაძლებელი, რაც წლის დასაწყისთან შედარებით 0,63%-იან ზრდას ნიშნავს. კომპანიაში ამბობენ, რომ მიმდინარე კვარტალში საკუთარი აქციების გამოსყიდვაზე 14.1 მილიარდი დოლარი დახარჯეს, ხოლო დივიდენდებისთვის 244 მილიონი დოლარი გაიღეს.

გახსენი საინვესტიციო ანგარიში თიბისის მობაილბანკში და შეიძინე ამერიკული აქციები და ფონდები საკომისიოს გარეშე. გაითვალისწინე, რომ ეს არ არის ფინანსური რჩევა.