სლოვაკეთის მთავრობამ ევროკავშირის დაცული სახეობების სიაში შემავალი მურა დათვების ხორცის საჯაროდ გაყიდვის უფლება გასცა.

გასულ თვეში სლოვაკეთის მთავრობამ ქვეყანაში მობინადრე დაახლოებით 1,300 დათვიდან მეოთხედის ლიკვიდაციის უფლება გასცა, რაც ბოლო დროს მომხდარ ფატალურ შემთხვევებს მოჰყვა. ამ გადაწყვეტილებამ ქვეყნის ოპოზიციის, გარემოსდამცველებისა და ევროპული პარლამენტის მწვავე კრიტიკა გამოიწვია, ვინაიდან მურა დათვი ბუნების დაცვის მსოფლიო კავშირის (IUCN) მიერ გადაშენების საფრთხესთან მიახლოებულ სახეობადაა აღიარებული.

ფოტო: Wildlife SOS

კრიტიკის მიუხედავად, სლოვაკეთის მთავრობა მაინც აგრძელებს ამ გეგმის აღსრულებას. ამ კვირაში გავრცელებული ინფორმაციის მიხედვით, დახოცილი დათვების ხორცი საჯაროდ გაიყიდება, რათა არ მოხდეს რესურსის გაფლანგვა. შემდეგი კვირიდან გარემოს დაცვის სამინისტროს დაქვემდებარებაში მყოფ ორგანიზაციებს შეეძლებათ ხორცის გაყიდვა, თუ შესრულდება ყველა სამართლებრივი და ჰიგიენური მოთხოვნა.

დათვების თემა პოლიტიკური მას შემდეგ გახდა, რაც აპრილში სლოვაკეთის ერთ-ერთ ტყეში დათვმა კაცი მოკლა. 2000-2020 წლებში ქვეყანაში დათვის მიერ ადამიანებზე თავდასხმის 54 შემთხვევა დაფიქსირდა. სლოვაკეთი ევროპაში მეორე ადგილზეა რუმინეთის შემდეგ (სადაც შავი დათვების რაოდენობა სავარაუდოდ 13,000-ს აღწევს) თავდასხმების რაოდენობით.

სლოვაკეთის მთავრობა 350-მდე მურა დათვის დახოცვას გეგმავს — ეს რიცხვი შეესაბამება ესპანეთში ამ სახეობის მთელ პოპულაციას. მათი მტკიცებით, ეს მიდგომა დათვების თავდასხმის სიხშირეს შეამცირებს, თუმცა გარემოსდამცველთა აზრით, ეს მხოლოდ სახეობის მწვავე საფრთხეში ჩაგდებას გამოიწვევს და მთავრობის მხრიდან აქცენტი თავდასხმების პრევენციაზე უნდა გაკეთდეს.