აფხაზეთის ავტონომიური რესპუბლიკის მთავრობის თავმჯდომარე ლევან მგალობლიშვილმა თანამდებობა დატოვა. ამის შესახებ ის სოციალურ ქსელში თავად წერს.

"გუნდთან და პრემიერ-მინისტრთან კონსულტაციის შემდეგ, მივიღე გადაწყვეტილება, დავტოვო თანამდებობა.

მინდა მადლობა გადავუხადო აფხაზეთის ავტონომიური რესპუბლიკის მთავრობის, სამინისტროების ყველა თანამშრომელს, უმაღლესი საბჭოს დეპუტატებს მხარდაჭერისთვის, იმ ათასობით დევნილს, რომელსაც პირადად შევხვდი ამ მოკლე დროში, მაგრამ ჩვენ შევძელით მცირედი, თუმცა ნაყოფიერი პროექტების განხორციელება.

მადლობა მხარდაჭერისთვის, მე ვრჩები თქვენთან როგორც ენგურს გაღმა, ასევე გამოღმა მცხოვრებ დროებით დევნილი მოქალაქეების უფლებების სადარაჯოზე", — წერს ლევან მგალობლიშვილი.

ინფორმაცია ლევან მგალობლიშვილის თანამდებობის დატოვების შესახებ 23 მაისს გავრცელდა.

აფხაზეთის უმაღლესი საბჭოს თავმჯდომარემ, ჯემალ გამახარიამ ტვ პირველთან დაადასტურა, რომ ლევან მგალობლიშვილი აფხაზეთის ავტონომიური რესპუბლიკის მთავრობის თავმჯდომარე აღარ არის.

"არავის არ გადაუყენებია, შემიძლია ეს გითხრათ, მაგრამ გადაწყვეტილება მოულოდნელად იქნა მიღებული. მე ამ დილით გავიგე, ჯერ მისაუბრია ლევანთან", — ამბობს გამახარია.