"საქართველოს პატრიოტი ხელისუფლება ჰყავს და სწორედ ეს არ მოსწონს ევროპელი ბიუროკრატების ნაწილს", — ასე შეაფასა თბილისის მერმა, კახა კალაძემ ევროპელი დეპუტატის მხრიდან ოცნების ხელისუფლების კრიტიკა.

მისი თქმით, "ბოლო წლებში რამდენიმე მცდელობა იყო სახელმწიფო გადატრიალების, ხელისუფლების დამხობის. ეს ყველაფერი გარედან ფინანსდებოდა".

"ვიცით მოტივი, თუ რატომ აკეთებენ ამ ტიპის განცხადებებს. ეს არ არის პირველი შემთხვევა. არ არის ახალი არც ჩვენთვის, არც ქართული საზოგადოებისთვის. ევროპელი ბიუროკრატების ნაწილი საქართველოში არჩევნებში დამარცხდა. ისინი გამჭვირვალობის კანონზე მოგვიწოდებდნენ, ცუდია, დემოკრატიას ეწინააღმდეგებაო, ამ დროს ბრიუსელში თავადვე საუბრობენ, რომ მსგავსი ტიპის კანონპროექტები უნდა მიიღონ.

ბოლო წლებში რამდენიმე მცდელობა იყო სახელმწიფო გადატრიალების, ხელისუფლების დამხობის. ეს ყველაფერი გარედან ფინანსდებოდა. მათ ჰყავდათ და ჰყავთ თავიანთი პატრონები, რომლებსაც უნდათ საქართველოში ხელისუფლება შეიცვალოს, რადგან პატრიოტი ხელისუფლება ჰყავს ქვეყანას, რომელიც ხალხის ინტერესებს იცავს. სწორედ ეს არ მოსწონთ. ვერ შეძლეს ხელისუფლებაში თავიანთი აგენტურა მოეყვანათ, რომლებიც მზად იყვნენ, ყველაფერი გაეკეთებინათ, რასაც პატრონები დაავალებდნენ, თუნდაც ქვეყნის წინააღმდეგ წასვლა", — განაცხადა თბილისის მერმა.