გასულ პარასკევს აშშ-ს პრეზიდენტმა, დონალდ ტრამპმა პრესკონფერენცია ჩაატარა, სადაც ჟურნალისტებმა კითხეს, განიხილებოდა თუ არა თეთრ სახლში შონ “დიდი” ქომბსის შესაძლო შეწყალება, რომელიც სექსუალურ ტრეფიკინგში, გაუპატიურებასა და სხვა დანაშაულებშია ბრალდებული.

“ჯერჯერობით არავის უთხოვია [ქომბსის შეწყალება], მაგრამ ვიცი, რომ ხალხი ამაზე ფიქრობს. მგონია, რომ ზოგი ადამიანი ძალიან ახლოსაა ამის თხოვნასთან,” — თქვა ტრამპმა და აღნიშნა, რომ თუ ქომბსს სასამართლო დამნაშავედ ცნობს, მისი საქმის დეტალებს გადახედავს და შეწყალების იდეასაც განიხილავს.

ტრამპის განცხადებას გამოეხმაურა 50 ცენტი, რეპერი, რომელსაც ქომბსთან უკვე მრავალწლიანი დაპირისპირება აკავშირებს და რომელიც “დიდის” დანაშაულების შესახებ დოკუმენტურ ფილმს იღებს. 50 ცენტმა საპასუხო განცხადებები ინსტაგრამზე გააკეთა:

"ქომბს ტრამპზე ძალიან ცუდი რაღაცები აქვს ნათქვამი. ტრამპს დავუკავშირდები და გავაგებინებ, რას ვფიქრობ ქომბსზე," — დაწერა Candy Shop-ის ავტორმა რეპერმა სოციალურ ქსელში. "დონალდი უპატივცემულობას არ იღებს და არ ავიწყდება, ვინ მიდის მის წინააღმდეგ. ის დაუღლელად შრომობს, რათა ამერიკა კვლავ დიდებული გახადოს და ყურადღების გაფანტვის დრო არ აქვს. ის ნებისმიერის შეწყალებას განიხილავს, ვისაც უსამართლოდ მოექცნენ, მაგრამ არა Puff Daddy-ს."

ცნობისთვის, შონ "დიდი" ქომბსის საქმე ამჟამად აშშ-ის ფედერალურ სასამართლოშია წარდგენილი სერიოზული ბრალდებებით, რომლებიც მოიცავს სექსუალურ ტრეფიკინგს, რეკეტს და პროსტიტუციის ხელშეწყობას. ამასთან ერთად, ქომბსს 25 ადამიანი დებს ბრალს გაუპატიურებაზე, მაშინ, როცა არასრულწლოვანები იყვნენ. "დიდის" საქმე ამჟამად მანჰეტენის სასამართლოში განიხილება.

იხილეთ ასევე: