სისხლის სამართლის საერთაშორისო სასამართლოს პროკურორმა, კარიმ ხანმა, 2008 წლის აგვისტოს ომის გამოძიების ეტაპის დასრულების შესახებ განაცხადა.

რატომ არის მნიშვნელოვანი: სისხლის სამართლის საერთაშორისო სასამართლოს დაარსებიდან ოცი წლის შემდეგ ეს არის პირველი შემთხვევა, როდესაც ოფისმა გადაწყვიტა სასამართლოს წარმოებაში არსებულ სიტუაციასთან დაკავშირებით გამოძიების ეტაპი დაესრულებინა.

  • "ვინაიდან გარემოებები არსებითად არ შეცვლილა, საქართველოს სიტუაციის გამოძიების ეტაპი დასრულდა. აღნიშნული გადაწყვეტილების შესახებ მე უკვე ვაცნობე საქართველოს ხელისუფლებას," — ნათქვამია კარიმ ხანის განცხადებაში.
  • თუმცა, ჰააგის სასამართლო თვალყურს მიადევნებს დაპატიმრების ორდერის ადრესატების სამართალში მიცემის ღონისძიებებს.

დეტალები: საქმეზე გამოძიება 2016 წლის 27 იანვარს დაიწყო, სისხლის სამართლის საერთაშორისო სასამართლოს იურისდიქციაში შემავალი ადამიანურობისა და ომის დანაშაულებთან დაკავშირებით.

  • გამოძიების შედეგად, 2022 წლის 30 ივნისს პირველმა წინასასამართლო პალატამ სამი ბრალდებული პირის, მიხაილ მინძაევის, გამლეტ გუჩმაზოვის და დავიდ სანაკოევის დაპატიმრების ორდერები გამოსცა.
  • გამოძიება მათ ედავება ეთნიკურად ქართველი მშვიდობიანი მოსახლეობის თავისუფლების უკანონო აღკვეთას, წამებას, სასტიკ მოპყრობას, მძევლად აყვანასა და, შემდგომში, მათ უკანონო გადაადგილებას, რუსული ოკუპაციის ფარგლებში.
  • მთავარი პროკურორის განცხადებით, აღნიშნული დანაშაულებრივი ქმედებების უფრო ფართო ხასიათზე მიუთითებს, კერძოდ, ქართული სოფლებისა და ქართველების კუთვნილი სახლების მასობრივ ძარცვაზე და განადგურებაზე, ასევე, ცხინვალის რეგიონის თითქმის მთელი ქართული მოსახლეობისთვის დაბრუნების უფლებაზე უარის თქმაზე.

ვისი დაკავების ორდერი გასცა სასამართლომ: მიხაილ მინძაევი, იყო რუსეთის შსს-ის უფროსი პოლიციელი, 2005-დან 2008 წლის 31 აგვისტომდე დე ფაქტო სამხრეთ ოსეთის შს მინისტრი.

  • სავარაუდოდ, პასუხისმგებელია 2008 წლის 8-დან 27 აგვისტომდე ჩადენილი ომის დანაშაულებისთვის (უკანონო პატიმრობა, წამება, არაადამიანური მოპყრობა, პირადი ღირსების შეურაცხყოფა, მძევლების აყვანა, მშვიდობიანი მოქალაქეების უკანონოდ გადაყვანა).
  • გამლეტ გუჩმაზოვი, რუსეთისა და სავარაუდოდ, საქართველოს მოქალაქეც. შესაბამის პერიოდში იზოლატორის ხელმძღვანელი. სავარაუდოდ, პასუხისმგებელია 2008 წლის 8-დან 27 აგვისტომდე ომის დანაშაულებზე (უკანონო პატიმრობა, წამება და არაადამიანური მოპყრობა, ღირსების შელახვა, მძევლების აყვანა და მშვიდობიანი მოქალაქეების უკანონო გადაყვანა).
  • დავით სანაკოევი — იმ პერიოდში სამხრეთ ოსეთის დე ფაქტო ადმინისტრაციის ომბუდსმენი. სავარაუდოდ, პასუხისმგებელია 2008 წლის 8-დან 27 აგვისტოსმდე ჩადენილ ომის დანაშაულებზე (მძევლების აყვანა და მშვიდობიანი მოქალაქეების უკანონო გადაყვანა).