გაეროს გენერალურ ასამბლეაზე რეზოლუციას მხარი 94-მა ქვეყანამ დაუჭირა, წინააღმდეგი 14 იყო, ხოლო 73-მა თავი შეიკავა. მხარდამჭერთა შორის არის საქართველოც.

რატომ არის მნიშვნელოვანი: რეზოლუციის მხარდამჭერები რუსეთის ქმედებების შედეგად მიყენებული ზარალის, დანაკარგის და ზიანის ასანაზღაურებლად საერთაშორისო მექანიზმის შექმნის აუცილებლობაზე თანხმდებიან.

  • როგორც უკრაინსკა პრავდა წერს, რეზოლუცია რეკომენდაციას უწევს გაეროს წევრებს, უკრაინასთან თანამშრომლობით, შექმნან ზარალის საერთაშორისო რეესტრი, რათა დაფიქსირდეს ყველა ფიზიკური და იურიდიული პირისთვის მიყენებული ზიანის მტკიცებულება.
  • დოკუმენტში ნათქვამია, რომ რუსეთმა პასუხი უნდა აგოს უკრაინაში და უკრაინის წინააღმდეგ საერთაშორისო სამართლის, ასევე საერთაშორისო ჰუმანიტარული სამართლისა და ადამიანის უფლებების ყველა დარღვევისთვის.

დეტალები: გაეროში უკრაინის მუდმივმა წარმომადგენელმა, სერხი კისლიციამ, რომელმაც დოკუმენტი წარადგინა, ხაზგასმით აღნიშნა, რომ რეზოლუციის მხარდაჭერა არ ნიშნავს კონფლიქტის ერთ-ერთ მხარის გვერდში დგომას, რადგან საუბარია გაეროს წესდების, მისი მიზნებისა და პრინციპების მხარდაჭერაზე.

  • რეზოლუციის წინააღმდეგი ქვეყნები იყვნენ — ბაჰამის კუნძულები, ბელორუსი, ჩინეთი, კუბა, ჩრდილოეთ კორეა, ერითრეა, ეთიოპია, ირანი, მალი, ნიკარაგუა, რუსეთი, სირია, ცენტრალური აფრიკის რესპუბლიკა და ზიმბაბვე.

უკრაინა: პრეზიდენტის, ვოლოდიმირ ზელენსკის განცხადებით, რეზოლუციით მწვანე შუქი აინთო უკრაინაში რუსული დანაშაულისთვის კომპენსაციის მექანიზმის შექმნას — "აგრესორი გადაიხდის იმას, რაც გააკეთა.

  • "ხერსონის გათავისუფლების გამარჯვებიდან ნიუ-იორკში დიპლომატიურ გამარჯვებამდე", — დაწერა ზელენსკიმ.