ოცნების პარლამენტის თავმჯდომარემ, შალვა პაპუაშვილმა საქართველოს პარლამენტის აპარატის სისტემური, ეფექტიანი მმართველობის უზრუნველსაყოფად პარლამენტის აპარატში 2025 წლის 3 აპრილიდან რეორგანიზაცია გამოაცხადა.

პაპუაშვილის მიერ ხელმოწერილ ბრძანებაში ვკითხულობთ, რომ ამ რეორგანიზაციის შედეგადაც შეიცვლება პარლამენტის აპარატის სტრუქტურა და საშტატო ნუსხა.

ბრძანების მიხედვით, რეორგანიზაცია შეეხება პარლამენტის აპარატის შემდეგ სტრუქტურულ ერთეულებს:

ა) ადამიანური რესურსებისა და ინსტიტუციური განვითარების დეპარტამენტი;

ბ) ინფორმაციული ტექნოლოგიებისა და ტელეკომუნიკაციების დეპარტამენტი;

გ) იურიდიული დეპარტამენტი;

დ) საერთაშორისო ურთიერთობათა დეპარტამენტი;

ე) საზოგადოებასთან ურთიერთობისა და ინფორმაციის დეპარტამენტი;

ვ) სამეურნეო უზრუნველყოფის დეპარტამენტი;

ზ) საორგანიზაციო დეპარტამენტი;

თ) საფინანსო უზრუნველყოფის დეპარტამენტი;

ი) საქმისწარმოების დეპარტამენტი;

კ) მანდატურის სამსახური;

ლ) პარლამენტის საბიუჯეტო ოფისი.

რეორგანიზაციის განხორციელებისას პასუხისმგებელი პირი საქართველოს პარლამენტის აპარატის უფროსი კახა ოქროჯანაშვილია.

პარლამენტში დაგეგმილ რეორგანიზაციაზე კომენტარი გააკეთა საპროცესო საკითხთა და წესების კომიტეტის თავმჯდომარემ, დავით მათიკაშვილმა.

ის "საჯარო სამსახურებში განხორციელებული რეორგანიზაციის პროცესში რაიმე ფორმის პოლიტიკურ ანტურაჟს გამორიცხავს".

"პარლამენტის აპარატში რაიმე ფორმის ცვლილებების შეტანა, მისი რეორგანიზაცია პარლამენტის თავმჯდომარის დისკრეციაა და ამ ტიპის გადაწყვეტილებებს ის იღებს. უნდა ვივარაუდოთ, რომ ემპირიული გადაწყვეტილებით, რაც პარლამენტში არსებობს, იმ დაკვირვებით, რაც პარლამენტის თავმჯდომარეს ჰქონდა, მან მიიღო გადაწყვეტილება, რათა პარლამენტის აპარატის სტრუქტურები უფრო მეტად ეფექტიანი, მოქნილი და შრომისუნარიანი გახადოს. ეს მთლიანად პარლამენტის თავმჯდომარის დისკრეციაა.

ყველა სახელმწიფო სტრუქტურა რეორგანიზაციის თაობაზე გადაწყვეტილებას თავად იღებს. მას საკუთარი მიზნები და ამოცანები გააჩნია. რაიმე ფორმით პოლიტიკურ ანტურაჟს გამოვრიცხავ", — განაცხადა მათიკაშვილმა.