ოკუპანტი ქვეყნის პრეზიდენტმა დასავლეთი ისევ გააკრიტიკა, ამჯერად ვალდაის ფორუმზე.

რატომ არის მნიშვნელოვანი: პუტინმა, რომელიც უკრაინაში ათასობით ადამიანის სიკვდილზეა პასუხისმგებელი, "დასავლური ელიტები" საშიშ, სისხლიან და ბინძურ თამაშში დაადანაშაულა.

  • ის, ასევე, შეეცადა, მსოფლიოს პრობლემების უმეტესი ნაწილი, მათ შორის, რუსეთის უკრაინაში შეჭრაც და შექმნილი კრიზისიც დასავლეთისთვის დაებრალებინა, შემდეგ კი თქვა, რომ ეს გარდაუვალი იყო.
  • ასევე, დასავლეთის მთავრობებს ბრალი დასდო იმაში, რომ უკრაინას მხარს გლობალური ბატონობის და მსოფლიოს ბუნებრივ რესურსებზე კონტროლის მოპოვებისთვის უჭერენ.

დეტალები: ოკუპანტი ქვეყნის პრეზიდენტმა თქვა, რომ არ შეიძლება ყველაფერი კრემლის ინტრიგებს დააბრალო.

  • "უკრაინაში ცვლილებები არ დაწყებულა სპეციალური სამხედრო ოპერაციის დაწყებით. ეს ცვლილებები მრავალი წელია გრძელდება. მსოფლიოს წესრიგში ტექტონიკური ცვლილება მრავალი წელია მიმდინარეობს".

პუტინი აქაც ტრადიციული რიტორიკის გატარებას ცდილობდა და თქვა, რომ NATO-მ გაფართოების სურვილით სრულად უგულებელყო უსაფრთხოების სფეროში არსებული ინტერესები, თუმცა მათი ეს მცდელობა "უბრალოდ ჩაიშალა".

  • ამასთან, კიდევ ერთხელ გაიმეორა ნარატივი, რომ "რუსები და უკრაინელები ისტორიულად ერთი ხალხია" და უკრაინაში შეჭრა სამოქალაქო ომს შეადარა.
  • ამ პროპაგანდას დიდი ხნის წინ უპასუხეს უკრაინის ლიდერებმა და თქვეს, რომ "ძმობის" მითი საბოლოოდ დაიმსხვრა, როდესაც თებერვალში უკრაინაში რუსული რაკეტები გამოჩნდნენ.
  • თუმცა, მანამდე პუტინმა "დასავლეთის ქვეყნებთან ურთიერთობების გამოსწორების აუცილებლობაზე" ისაუბრა და ამტკიცებდა, რომ მოსკოვი "არასდროს განიხილავს და არ თვლის დასავლეთს თავის მტრად".