ცნობილი ამერიკელი რეჟისორი ლილი ვაჩოვსკი ჟურნალ Variety-სთან ინტერვიუში აცხადებს, რომ ჰარი პოტერის ავტორი ჯოან როულინგი ტრანსგენდერი ადამიანების "გენოციდს" აფინანსებს. ტრანსგენდერ ქალ რეჟისორს, რომელმაც ლანა ვაჩოვსკისთან ერთად მატრიცის კინოფრენჩაიზი შექმნა, ინტერვიუერმა ჰკითხა, რას ფიქრობს ილონ მასკსა და ჯოან როულინგზე, რომლებმაც ტრანსგენდერი ადამიანების თემს "უსაზღვროდ დიდი კულტურული ზიანი მიაყენეს". ვაჩოვსკიმ განაცხადა რომ ორივე, მასკიც და როულინგიც, "პირდაპირი მნიშვნელობით ნაცისტები" არიან.

"ჯოან როულინგი ტრანსგენდერების გენოციდს აფინანსებს. მორჩა", — ამბობს რეჟისორი, — "ასე რომ, ჰარი პოტერს თუ მხარს უჭერ, მხარს უჭერ ტრანსგენდერების გენოციდს. იმ ფულის ნაწილი, რომელსაც შენ ამ პროდუქტებით სარგებლობისთვის იხდი, როულინგს ერიცხება, ეს ფული კი მერე მთელ მსოფლიოში მის მიერ მხარდაჭერილ, ტრანსგენდერების წინააღმდეგ მიმართულ სამართლებრივ ინიციატივებს ხმარდება. ისევე, როგორც თუკი ილონ მასკს ეწინააღმდეგები, მას ბოიკოტსაც უცხადება და არ ყიდულობ ტესლას; გლობალურ დათბობას ან კლიმატის ცვლილებას თუ ეწინააღმდეგები, საწვავის გამოყენებას ზღუდავ, ამ პროდუქტების მოხმარებას ამცირებ. ეს მარტივი მათემატიკაა. ამდენად, როცა ერთობი ამ სერიალებით [ჰარი პოტერის მომავალი სერიალი] და მათ მხარს უჭერ, მხარს უჭერ ჩემს მოსპობასაც".

ვაჩოვსკის ამ განცხადებას ჯოან როულინგის წარმომადგენელიც გამოეხმაურა. მწერლის აგენტმა ნილ ბლერმა სიტყვის თავისუფლების მნიშვნელობას გაუსვა ხაზი და აღნიშნა, რომ აუცილებელია, ჯოან როულინგის ხედვა "სიზუსტით" იყოს წარმოჩენილი.

"ლილი ვაჩოვსკის განცხადების შესასწორებლად, გეტყვით, რომ ჯოან როულინგის ქალთა ფონდის საშუალებით მწერალი მხარს უჭერს ქალებს, სამართლებრივად იბრძოლონ ბრიტანეთში 2010 წელს მიღებული თანასწორობის აქტით მინიჭებული უფლებების შესანარჩუნებლად. ეს უფლებები ხშირადაა უგულებელყოფილი ან საფრთხის ქვეშ", — ნათქვამია როულინგის აგენტის განცხადებაში, — "თუმცა, როულინგი მხარს არ უჭერს სამართლებრივ ინიციატივებს, რომლებიც მიზნად ისახავს ტრანსგენდერი ადამიანებისთვის ზიანის მიყენებას ან მათი უფლებების შეზღუდვას".

"შეიძლება [როულინგს] არ ეთანხმებოდეთ, მაგრამ ასეთი სერიოზული ცილისმწამებლური ბრალდებები, მით უფრო პარალელის გავლება ნაცისტებთან და მათ მიერ ჩადენილ გენოციდთან, არასდროს უნდა იყოს წარმოდგენილი ფაქტად, როცა ყველანაირ საფუძველსაა მოკლებული და შეთხზულია".