კუბაში ქორწინების თანაბარ უფლებას რეფერენდუმში მონაწილე მოსახლეობის უმეტესობამ მხარი დაუჭირა, შესაბამისად, ქვეყანაში ერთი და იმავე სქესის წყვილების ქორწინება ლეგალური გახდა.

კუბის საარჩევნო საბჭოს განცხადებით, რეფერენდუმში მონაწილეობის უფლებამოსილი მოსახლეობის 74,1%-მა დააფიქსირა საკუთარი პოზიცია. მათგან თითქმის 67-მა პროცენტმა, ანუ 3,9 მილიონზე მეტმა მოქალაქემ ქორწინების თანაბარ უფლებას მხარი დაუჭირა.

ახალი საოჯახო კოდექსი, რომელსაც რეფერენდუმით ეყარა კენჭი, ლგბტქ წყვილებს ქორწინებისა და ბავშვის შვილად აყვანის უფლებას ანიჭებს, თუმცა, ამავდროულად, ქალების, ბავშვებისა და ხანდაზმულების დასაცავად ახალშემუშავებულ ზომებსაც მოიაზრებს.

კუბაში, რომელსაც კომუნისტური პარტია მართავს, ლგბტქ ადამიანები წლების განმავლობაში ხდებოდნენ დისკრიმინაციის მსხვერპლნი, მათ შორის, სახელმწიფო უწყებების მხრიდანაც. მას შემდეგ, რაც 1960-იან წლებში ძალაუფლება ფიდელ კასტრომ იგდო ხელთ, ქვიარ ადამიანები პოლიტიკურ დისიდენტებთან ერთად შრომით ბანაკებში გაამწესეს. 1979 წლიდან ქვეყანაში ჰომოსექსუალობა დანაშაულად აღარ მიიჩნევა, თუმცა, ლგბტქ ადამიანების ცხოვრება კუბაში მაინც რთული დარჩა. სულ რამდენიმე წლის წინ, 2019-ში, პოლიციამ ქვიარ აქტივისტების მშვიდობიანი მსვლელობაც კი დაარბია და განაცხადა, რომ მათ ამის ნებართვა არ ჰქონდათ.

კუბის ყოფილი პრეზიდენტის შვილი მარიელა კასტრო დედაქალაქ ჰავანაში გამართულ პრაიდზე 2018 წელს

ფოტო: Yamil Lage / AFP / Getty Images

კუბის ყოფილი პრეზიდენტის, რაულ კასტროს, შვილი მარიელა კასტრო ღიად უჭერს მხარს ლგბტქ ადამიანების უფლებებს და ამისთვის სახელმწიფო დაფინანსების მქონე ცენტრსაც კი იყენებდა. თუმცა, როცა საქმე ქორწინების თანაბარ უფლებაზე მიდგა, კუბელმა პოლიტიკოსებმა ჰომოფობიური გამოხმაურების შიშით უკან დაიხიეს.

აღსანიშნავია, რომ ახალშემუშავებული საოჯახო კოდექსის წინააღმდეგი კუბაში რელიგიური საზოგადოებაც იყო. თუმცა, რეფერენდუმამდე კვირებით ადრე ქვეყნის ხელისუფლებამ განცხადება გაავრცელა და აღნიშნა, რომ კოდექსი იმის დასტურიც იყო, თუ როგორ უწყობს ფეხს თანამედროვეობას ათწლეულების წინ მომხდარი რევოლუცია.