ჭიათურაში, კაცხის სვეტის მიმდებარე ტერიტორიაზე, იქ სადაც კაცხის მონასტერი მდებარეობს, სამღვდელოების ნაწილმა კლდეზე მცოცავებს ვარჯიში აუკრძალა. ამის შესახებ On.ge-ს ერთი-ერთმა მეკლდეურმა, ნუცა ხუციშვილმა განუცხადა. მისი თქმით, აღნიშნული საცოცი ტრასები წლების წინ თავისივე ხარჯებით მოაწყვეს, თუმცა ამჟამად ტერიტორიას სასულიერო პირებმა ღობე შემოავლეს:

"ჩემი მეგობარი გუგა დაბრუნდაშვილი თავისი სახსრებით და ძალებით აშენებდა ამ კედლებს. ამ ყველაფერს გვართმევენ ახლა ერთ დღეში. გვეუბნებიან, რომ ეს არის მონასტრის ტერიტორია და აღარ შეგვიძლია იქ ვარჯიშის გაგრძელება".

ნუცა ხუციშვილი თქმით, პროცესი დაახლოებით 1,5 წლის წინ დაიწყო. ის ამბობს, რომ არ შეეგუება ამ ტერიტორიის დათმობას და იმედია აქვს, მეკლდეურთა ფედერაციის წარმომადგენელი დაელაპარაკება საპატრიარქოს. ხუციშვილი არ გამორიცხავს აქციის გამართვასაც.

კაცხში დაწესებული შეზღუდვით უკმაყოფილოა კიდევ ერთი მეკლდეური ანა დულარიძე, რომელიც ჭიათურის რაიონიდან დღეს, 2 ივნისს დაბრუნდა და თან წამოიღო კლდეზე დამაგრებული ყველა ის აღჭურვილობა, რომლის საშუალებითაც მეკლდეურები სარგებლობდნენ.

ანა დულარიძის თქმით, კაცხის მიმდებარე ტერიტორიაზე კლდეზე ცოცვას სასულიერო პირები უშლიან ხელს, რადგან ტერიტორია შემოღობეს და მშენებლობა დაიწყეს. შემოღობილ ტერიტორიაზე კი მოხვდა ის კლდეები, რომლითაც მეკლდეურები სარგებლობდნენ:

"როგორც თვითონ ამბობენ ჩვენ მათ ვაწუხებთ, არ მოსწონთ რომ ვცოცავთ შორტით, თუ მაისურით. ბოლო ორი წელია აქტიურად მიდის ამაზე საუბარი. სიტუაცია ამჟამად ასეთია: ტერიტორიაზე არ გვიშვებენ თავისუფლად და ამის გამო ჩვენც აღარ მოგვწონს იქ არსებული სიტუაცია. მაგალითად, მაისურით ვცოცავდით და გვითხრეს, რომ ჩაგვეცვა. დღეს კლდიდან ჩამოვხსენით დაცვის საშუალებები, რომლის გამოყენებითაც ვცოცავთ და ეგ თუ არ გვექნება ე.ი. იქ ვეღარ ავალთ".

ნუცა ხუციშვილის თქმით, მეკლდეურები კაცხის სვეტზე ცოცვაში ათწლეულების წინ ვარჯიშობდნენ, რის შემდეგაც სასულიერო პირებმა დაიკავეს კაცხის სვეტი, შემოსაზღვრეს ტერიტორია: "მერე დაიწყეს საუბარი, რომ აქ გოგოების გაჩერება არ შეიძლებაო იმიტომ, რომ მამათა მონასტერი არისო. ჩვენ ველოდებოდით ფედერაციის პასუხს, რომ რაღაც მოგვემოქმედებინა, თუმცა ფედერაციამ არაფერი არ მოიმოქმედა, ამის შემდეგ ბიჭებსაც აუკრძალეს ვარჯიში და ცოცვა იმ ტერიტორიაზე. კაცხის სვეტიდან მოშორებით 500 მეტრში, სხვა საცოცი კედელიც არის, რომელსაც კანიონს ვეძახით. მის თავზე კაცხის სვეტის მონასტრიდან გაძევებულმა მამა მაქსიმემ დაიწყო ეკლესიის აშენება და ის ტერიტორიაც შემოსაზღვრეს. არც იქ დაგვედგომება და არც კაცხის ტერიტორიაზე, ანუ საერთოდ გამოგვაძევეს ჭიათურიდან".

საქართველოს საპატრიარქოს წარმომადგენელმა მამა მიქაელ ბოტკოველმა On.ge-სთან საუბარში თქვა, რომ ზუსტი ინფორმაცია, თუ რა ხდება ჭიათურაში, არ აქვს, თუმცა მისი აზრით, შესაძლოა ადგილობრივი სამღვდელოება უსაფრთხოების მიზეზით არ აძლევს მცოცავებს ტერიტორიაზე შესვლის საშუალებას:

"იქ რა ხდება ზუსტად არ ვიცი, ალბათ, ერთადერთი მიზეზია უსაფრთხოება, ხომ შეიძლება რომ თუ ეს მართლაც საპატრიარქოსთვის გადაცემული მიწაა და ეს კოშკი ხომ შემაღლებულ ადგილზეა, რაიმე რომ დაემართოთ ადამიანებს, პასუხს ვის მოსთხოვენ? სხვა კლდე არ არის რომ იქ არ ივარჯიშონ? თუ იქ სიწმინდეა, ტაძარია, იქ რატომ უნდა ივარჯიშონ?".