NDI საზოგადოების აზრის კვლევის ახალ შედეგებს აქვეყნებს.

რატომ არის მნიშნველოვანი: ანგარიშში ინსტიტუტებისა და პოლიტიკური პარტიების მიმართ ნდობის შემცირების ტენდენცია გამოიკვეთა. გამოკითხულთა უმრავლესობა კი ქვეყნის ეკონომიკურ მდგომარეობას ცუდად აფასებს.

  • ასევე, მოსახლეობის უმეტესობას, რომ ახლა უფრო ნაკლები ფინანსური შესაძლებლობები აქვს, ვიდრე 5 წლის წინ.
  • კვლევის მიხედვით, ყოველი მესამე მოქალაქე ამბობს, რომ ხშირად ოჯახისთვის საკვების საყიდლად საჭირო ფული არ ჰქონდა.

ფოტო: NDI

დეტალები: კითხვაზე — ბოლო 12 თვის შესახებ თუ ვისაუბრებთ, რამდენჯერ მოხდა ისე, რომ არ გქონდათ ფული თქვენთვის ან თქვენი ოჯახისთვის საჭირო საკვების საყიდლად, პასუხები ასე გადანაწილდა:

  • ყოველთვე ან უფრო ხშირად — 30%;
  • უფრო იშვიათად, ვიდრე ყოველთვე — 29%;
  • არასდროს — 39%;
  • არ ვიცი — 1%.

ეროვნული და ადგილობრივი დონის გამოწვევები: კვლევაში აღნიშნულია, რომ სამუშაო ადგილები, ფასების ზრდა და სიღარიბე კვლავ ყველაზე მნიშვნელოვან ეროვნულ საკითხებად დასახელდა.

  • უმრავლესობის აზრით, ბოლო 10 წლის მანძილზე, ტერიტორიულ მთლიანობასთან, სიღარიბესთან და კრიმინალთან დაკავშირებით სიტუაცია გაუარესებულია;
  • 2018 წელთან შედარებით, ნაკლები ადამიანი ფიქრობს, რომ ხელმისაწვდომ ჯანდაცვასთან და სიტყვის თავისუფლებასთან დაკავშირებით მდგომარეობა გაუმჯობესდა;
  • გარდა ამისა, განათლების დაბალი ხარისხი და ონლაინ სწავლებასთან დაკავშირებული სირთულეები მთავარ გამოწვევებად დასახელდა;
  • სოფლებში ყველაზე მნიშვნელოვან ადგილობრივ საკითხებად წყლით მომარაგება, კანალიზაცია და გზები დასახელდა.

ფოტო: NDI

მეთოდოლოგია: კვლევა ჩატარებულია NDI-ის დაკვეთით CRRC საქართველოს მიერ, დიდი ბრიტანეთის მთავრობის UK aid-ის ფინანსური ხელშეწყობით.

  • აღნიშნული ანგარიში 14 ივლისიდან-15 აგვისტომდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით).
  • აგვისტოში ჩატარებული გამოკითხვა სულ 2 104 დასრულებულ ინტერვიუს მოიცავს;
  • საშუალო ცდომილების ზღვარი კვლევაში +/- 2 პროცენტია.

ამავე თემაზე: მოსახლეობის ნახევარი მთავრობის საქმიანობას უარყოფითად აფასებს — კიდევ რა გავიგეთ NDI-ის კვლევიდან