განსაკუთრებულად ცუდი ამინდის დროს, თბილისის მოსახლეობა ერთი იდუმალი კითხვის გარშემო ერთიანდება — რატომ დაბნელდა?

საკითხის აქტუალურობას, ფეისბუქისთვის თვალის მარტივი გადავლებაც მოწმობს. უეცრად ჩამობნელებულ ქალაქში, ხალხი შეშფოთებული წერს სტატუსებს და კითხვებზე პასუხს წლების წინანდელ სტატიებში ეძებს.

გადავწყვიტეთ, საბოლოოდ გავფანტოთ ღრუბლები ამ თემის გარშემო (pun intended) და სამთავრობო ან მეტეო-უწყებების შეწუხების გარეშე, წარმოგიდგინოთ სიმართლე დაბნელებული დღეების შესახებ.

დავიწყოთ მარტივი ფაქტით, რაც ყველამ ვიცით — ღრუბლების უმეტესობა, თეთრია. ხოლო წვიმის ღრუბლები, უფრო მუქ ფერს იღებენ ხოლმე. მაგრამ, რატომ?

ჯერ განვიხილოთ, როგორ იქმნება ღრუბელი: ჩვენს გარშემო არსებული ჰაერი სავსეა წყლის ორთქლით. როდესაც მიწასთან ახლოს მყოფი ჰაერი თბება, იგი ცივ ჰაერზე ზემოთ იწყებს აწევას და წყლის ორთქლიც თან მიაქვს.

სიმაღლეზე ასვლასთან ერთად, ჰაერი გაგრილებას იწყებს. ამ დროს, წყლის ორთქლი ატმოსფერულ მტვერზე ან მანქანის გამონაბოლქვის ნაწილაკებზე კონდენსირდება და წყლის მიკროსკოპულ წვეთებად იქცევა. დროთა განმავლობაში, ეს წვეთები იზრდებიან, ან, ყინულის კრისტალებად იქცევიან, ერთიანდებიან და ქმნიან ღრუბლებს.

ატმოსფერული ნაწილაკებისგან განსხვავებით, რომლებიც, მზის სხივის მოხვედრისას, უმეტესად ლურჯ სინათლეს ფანტავენ (ამიტომაცაა ცა ლურჯი), ღრუბლის ნაწილაკები ყველა ფერის სინათლეს თანაბრად აბნევენ, რაც თეთრ შუქს ქმნის.

თუმცა, წვიმის ღრუბელი უფრო მუქი ნაცრისფერია. ეს კი, მისი სიმაღლის ან სიმჭიდროვის გამოა. სქელ და მჭიდრო ღრუბელს, ჩვეულებრივისგან განსხვავებით, ბევრად მეტი წყლის წვეთი ან კრისტალი აქვს მოგროვილი. რაც უფრო სქელდება ღრუბლის მასა, მით უფრო მეტ სინათლეს ფანტავს მისი ზედაპირი და, შესაბამისად, მით უფრო ნაკლები სინათლე აღწევს ღრუბლიდან — მიწამდე.

წყლის მოძრაობა დედამიწაზე

წყლის მოძრაობა დედამიწაზე

ფოტო: On.ge

რადგან წვიმის ღრუბლის ქვეშ მყოფ ნაწილაკებამდე გასაბნევი სინათლე ვერ აღწევს, მიწიდან დანახვის დროს, ასეთი ღრუბლის “ძირი” მუქ ნაცრისფრად ჩანს.

რაც უფრო იზრდება ღრუბლის წვეთები ზომაში (მანამ, სანამ ციდან წვიმად ან თოვლად ჩამოვარდება), მით უფრო შესამჩნევი ხდება დამუქების ეფექტი, რადგან, დიდი წვეთი მეტ სინათლეს შთანთქავს, გაფანტვის მაგივრად.

აი, სწორედ ამიტომ ბნელდება თბილისში (და, სხვა ქალაქებშიც) წვიმამდე ან წვიმის დროს. იმედი გვაქვს, ეს საკითხი საბოლოოდ ამოწურულია. კარგ ამინდს გისურვებთ.