ელჩის დანიშვნის შესახებ სალომე ზურაბიშვილმა სპეციალურ ბრიფინგზე ისაუბრა.

რატომ არის მნიშვნელოვანი: დავით ბაქრაძე გაეროში საქართველოს ელჩად 31 აგვისტოს დაინიშნა.

  • ივლისში პრეზიდენტმა განაცხადა, რომ ელჩების დანიშვნაზე წარდგენილი 37 განცხადებიდან 36-ს მოაწერა ხელი — გარდა გაეროში დავით ბაქრაძის დანიშვნისა;
  • სალომე ზურაბიშვილმა უარყოფითად შეაფასა აშშ-ში ბაქრაძის საქმიანობა და თქვა, რომ ის 5 წელი იყო შტატებში, ქვეყნების ურთიერთობისთვის კი არაფერი გაუკეთებია.

დეტალები: პრეზიდენტმა ხელმოწერა იმით ახსნა, რომ პროცესები არ შეფერხებულიყო, რადგან რამდენიმე კვირაში გაეროს გენერალური ასამბლეის სხდომა გაიმართება.

  • "ხელი მოვაწერე არა იმიტომ, რომ ვიღაცამ დამაძალა, რაღაცის შემეშინდა, იმიტომ, რომ აქამდე, სანამ მიდიოდა კონსულტაციების ფორმა და სრულდებოდა წარდგენით, ყველა წარდგენაზე ხელი მოვაწერე, რომ ჩემ გამო არ ყოფილიყო შეფერხება;
  • "ჩემი მოსაზრებები არ იქნა მოსმენილი, შეფერხება არ უნდა იყოს და მით უმეტეს, ამ შემთხვევაში, რომელიც ეხება გაეროს გენერალური ასამბლეა იმართება 3 კვირაში და ჩვენი ქვეყნის ინტერესები ნამდვილად არ არის, რომ იქ არ ყოფილიყო სრულუფლებიანი ელჩი იმ მომენტში, როცა ძალიან მნიშვნელოვანი საკითხები იქნება განხილული".

ზურაბიშვილის თქმით, მის გადაწყვეტილებას, ერთი მხრივ დეპოლარიზაციისთვის უნდა შეეწყო ხელი, თუმცა ასე არ მოხდა.

  • "რადგან, ოხ, საკვირვებავ, მივიღე 7 წარდგენა ისე, რომ არცერთი კონსულტაცია არ ჩატარებულა და დამიდეს მაგიდაზე ეს შვიდი წარდგენა, რომელიც არის ერთგვარი პასუხი ამ ჩემს გადაწყვეტილებაზე და მე მგონი, საჭიროა და უფრო ვეღარ მოითმენს ეს სიტუაცია";
  • "საჭიროა, საკონსტიტუციომ განიხილოს ეს საკითხი, ტექსტები, არსებული პრაქტიკა და ის დოკუმენტები კონფიდენციალური, რაც ჩვენ გვაქვს და ამტკიცებს, რომ მუდმივად იყო კონფიდენციალური კონსულტაციები [...] ამიტომ საკონსტიტუციომ თავისი თქვა, მე ამას ველოდები მოუთმენლად".