როგორც საკონსულო წერს, ბოლო პერიოდში ხშირია შემთხვევები, როდესაც საქართველოში, თურქეთის გავლით, რუსეთიდან მომავალ რუს მოქალაქეებს არ უშვებენ.

რატომ არის მნიშვნელოვანი: ომის დაწყების შემდეგ საქართველოში ინტენსიურად შემოდიან რუსეთის მოქალაქეები. ოპოზიცია და სამოქალაქო საზოგადოება შესაძლო საფრთხეებზე მიუთითებს.

• TI-ის ანგარიშის მიხედვით, იანვარ-ივნისში რუსეთიდან 247 ათასი ვიზიტორი შემოვიდა, რაც 2019 წლის მონაცემებზე 3-ჯერ ნაკლებია.
• ეს საკითხი მმართველი გუნდის წევრების მხრიდან სპეკულაციის საგანია. მათ მოქალაქეთა პროტესტი ქსენოფობიად და დისკრიმინაციად შეაფასეს.
• მეტიც, ქართული ოცნების ლიდერებმა, ირაკლი კობახიძემ და მამუკა მდინარაძემ თქვეს, რომ "ქსენოფობია არის გოიმობა".
• ამავე ანგარიშის თანახმად, საქართველოში სულ 13 500-მდე რუსული კომპანიაა რეგისტრირებული და მათი ნახევარი უკრაინაში ომის დაწყების შემდეგ დარეგისტრირდა.

დეტალები: საკონსულოში ამბობენ, რომ მათთვის სარფის გამშვებ პუნქტზე ქართველი მესაზღვრეების მიერ შეშვებაზე უარი "როგორც წესი, დასაბუთებული და განმარტებული არ არის".

• ოკუპანტი ქვეყნის წარმომადგენლობის განცხადების მიხედვით, მათ შორის არიან უკრაინის ოკუპირებული რეგიონების, ყირიმის, დონეცკისა და ლუგანსკის მაცხოვრებლები, რომლებსაც რუსეთის მოქალაქეობა აქვთ.
• ასევე, წერენ, რომ საზღვარზე არ უშვებენ რუსეთის სხვა რეგიონებში მცხოვრებ პირებსაც, რომლებიც საქართველოში შემოსვლას თურქეთიდან ცდილობენ.

მათივე თქმით, აგვისტოს თვეში ასეთი შემთხვევები თითქმის ყოველ დღე აღირიცხა.

• გამოქვეყნებულ განცხადებაში ისინი საკუთარი ქვეყნის მოქალაქეებს მიმართავენ და მოუწოდებენ, რომ ეს ინფორმაცია გაითვალისწინონ.

რიცხვებში: შსს-ს მონაცემებით, მხოლოდ ოთხ თვეში, მარტიდან ივნისის ჩათვლით, სახელმწიფო საზღვარი რუსეთიდან 299 094-მა ადამიანმა გადმოკვეთა.

• საქსტატის მონაცემებით, 2022 წლის ივნისში უცხო ქვეყნის რეზიდენტებმა საქართველოში 387 781 ვიზიტი განახორციელეს. აქედან რუსეთიდან 90 239 ვიზიტი განხორციელდა, წლიური ზრდა 502,9%-ია.
• ტურიზმის ეროვნული ადმინისტრაციის ანგარიშებიდან კი ირკვევა, რომ 2022 წლის მარტში რუსეთის მოქალაქეებმა საქართველოში 22 536 ვიზიტი განახორციელეს.

კონტექსტი: ომის შემდეგ არაერთხელ იყო შემთხვევა, როდესაც საქართველოში პუტინის მიმართ ოპოზიციურად განწყობილი ჟურნალისტი თუ აქტივისტი არ შემოუშვეს.

• მათ შორის იყო რუსი ბლოგერი, ინსა ოგუზი, რომელსაც რუსეთში შინაპატიმრობა ჰქონდა მისჯილი და ქვეყნიდან გამოიქცა.
• ქვეყანაში შემოსვლაზე უარი უთხრეს რუს ფემინისტი და ანტიპუტინისტი აქტივისტების რუსული პანკ ბენდის, Pussy Riot-ის ერთ-ერთი წევრს, ოლგა ბორისოვას.
• ასევე, ქვეყანაში არ შემოუშვეს რუსული დამოუკიდებელი მედიის, დოჟდის ჟურნალისტი, მიხეილ ფიშმანი.

ტურისტულ რეგიონებში რუსეთის მოქალაქეების სიმრავლეა. ვრცელდება არაერთი ფოტო-ვიდეო და ზეპირი ისტორია იმაზე, რომ რუსები აპროტესტებენ ანტიოკუპაციურ პოსტერებს, ხმამაღლა უსმენენ რუსულ მუსიკებს და იწუნებენ უკრაინულს.

• გარდა ამისა, თბილისის ქუჩებში რამდენიმე ადგილას გაჩნდა რუსული ომის სიმბოლოდ ქცეული ასო Z, ამის ფონზე კი არაერთხელ გადაიღება ანტიოკუპაციური წარწერები.
• 15 აგვისტოს სოციალურ ქსელში გავრცელდა ფოტო, სადაც ჩანდა, რომ ერთ-ერთ ეზოში, რუსული დროშა იყო აღმართული — მოქალაქემ On.ge-სთან თქვა, რომ სახლი ჩაქვში მდებარეობს და გადაღებისას მას რუსი და ქართველი დაუპირისპირდა.
• 16 აგვისტოს ერთ-ერთმა მოქალაქემ გაავრცელა ფოტოები და ინფორმაცია იმის შესახებ, რომ რუსმა ბათუმში, ზღვაზე ანტიოკუპაციური ბანერი დაუხია.