ქართული ოცნების ყოფილი დეპუტატი, ვეტერანი მოჭიდავე ლუკა კურტანიძე, რომელსაც ყოფილი მეუღლის მიმართ ძალადობას, მისი ნივთის განზრახ დაზიანებასა და დამცავი ორდერით გათვალისწინებული მოთხოვნების შეუსრულებლობას ედავებიან, ბრალს არ აღიარებს. კურტანიძის ადვოკატმა ივანე მეფარიშვილმა "ინტერპრესნიუსს" განუცხადა, რომ ბრალდებული "პროვოკაციის მსხვერპლი აღმოჩნდა" და მას არავისზე უძალადია.

"ბრალს არ აღიარებს და მიაჩნია, რომ ეს დიდი პროვოკაციის შედეგია, რომელიც მის მიმართ განხორციელდა. კურტანიძე ძალიან დიდი პროვოკაციის მსხვერპლი აღმოჩნდა იმ ძალების მხრიდან, რომლებიც დესტაბილიზაციის და არეულობის შემოტანას ცდილობენ საზოგადოებაში. ამას საზოგადოება ბოლო თვეების განმავლობაში, ამა თუ იმ ფორმით აწყდებოდა, მათ შორის, საზოგადოებისთვის ცნობილი პიროვნებების მიმართ თავდასხმებს სხვადასხვა ფორმების გამოყენებით. ერთ-ერთი მსხვერპლი, მისი ყოფილი მეუღლე გამოიყენეს, რომელთანაც ცნობილი იყო, რომ კურტანიძეს პრობლემები, დავა ჰქონდა. ეს ეფექტურად გამოიყენეს და პატარა წარმატებას ამ კუთხით მიაღწიეს, ახლა კურტანიძე საპატიმროში იმყოფება და ბრალი სამი მუხლით აქვს წარდგენილი...

კითხვაზე, თუ ვინ მოაწყო პროვოკაცია, ადვოკატი პასუხობს, რომ "ეს ქალბატონი პროვოკატორად "ნაციონალურმა მოძრაობამ" გამოიყენა".

მისივე თქმით, კურტანიძე გამორიცხავს, რომ ფიზიკურად იძალადა ყოფილ მეუღლეზე. IPN-ის კითხვაზე, თუ სად მიიღო დაზარალებულმა დაზიანებები და ტვინის შერყევა, მეფარიშვილი პასუხობს, რომ ეს ექსპერტიზამ უნდა დაადგინოს.

პროკურატურის ინფორმაციით, ქართული ოცნების ყოფილ დეპუტატს, ვეტერან მოჭიდავეს, ლუკა კურტანიძეს ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით ბარლდება წარედგინა.

დანაშაული 5 წლამდე ვადით თავისუფლების აღკვეთას ითვალისწინებს.

ბათუმის საქალაქო სასამართლოში დღეს ლუკა კურტანიძის მიმართ აღკვეთის ღონისძიების შეფარდებაზე იმსჯელებენ. პროკურატურა კურტანიძისთვის პატიმრობის გამოყენებას მოითხოვს. რაც შეეხება დაცვის მხარეს, ადვოკატი აცხადებს, რომ ის კურტანიძის აღკვეთის ღონისძიების გარეშე დატოვებას მოითხოვს, სასამართლოს კი, ალტერნატივის სახით გირაოს შესთავაზებს.

ასევე იხილეთ: