ანუკა მაისურაძემ ბანერი წარწერით — რუსეთი ოკუპანტია, თქვენ აქ სახლში არ ხართ და არც არასდროს იქნებით — თბილისიდან მატარებლით წაიღო.

რატომ არის მნიშვნელოვანი: მისი თქმით, ეს წარწერა, დროშის ფორმით, ბათუმის სანაპიროზე ჰქონდა გატანილი, რის გამოც რუსი და საქართველოს მოქალაქე დაუპირისპირდნენ.

დეტალები: როგორც ის On.ge-ს უყვება, თავდაპირველად ბანერი სკამებისა და ქოლგების გამქირავებელმა აიღო და უთხრა, რომ "კლიენტებს უფრთხობდა", თუმცა უკან დააბრუნებინა.

  • ამის შემდეგ მასთან ქართველი კაცი მივიდა: "მომვარდა, მეჯაჯგურებოდა, არ მსიამოვნებს, ჩამომხსენიო".
  • მისი თქმით, ბოლოს რუსმა გოგომ, რომელიც სანაპიროზე სერფინგის დაფას აქირავებდა, ბანერებს ჯერ ფოტოები გადაუღო, შემდეგ კი დახია.
  • "რა უფლებით გიკიდიაო? მეთქი უფლება მაქვს ყველანარი ჩემი პროტესტი გამოვხატო ასეთი მშვიდობიანი სახით", — იხსენებს ანუკა მაისურაძე.

მოქალაქის თქმით, დაპირისპირებისას მის მიმართ მხარდაჭერა მხოლოდ ერთმა ქართველმა გოგომ გამოხატა.

  • "მერე მოვიდნენ მაშველები. მითხრეს, ხვალ უფრო დიდი მოიტანე და დაკიდეო", — ამბობს ის.

კონტექსტი: ტურისტულ რეგიონებში რუსეთის მოქალაქეების სიმრავლეა. ვრცელდება არაერთი ფოტო-ვიდეო და ზეპირი ისტორია იმაზე, რომ რუსები აპროტესტებენ ანტიოკუპაციურ პოსტერებს, ხმამაღლა უსმენენ რუსულ მუსიკებს და იწუნებენ უკრაინულს.

  • გარდა ამისა, თბილისის ქუჩებში რამდენიმე ადგილას გაჩნდა რუსული ომის სიმბოლოდ ქცეული ასო Z, ამის ფონზე კი არაერთხელ გადაიღება ანტიოკუპაციური წარწერები.
  • გუშინ, 15 აგვისტოს სოციალურ ქსელში გავრცელდა ფოტო, სადაც ჩანდა, რომ ერთ-ერთ ეზოში, რუსული დროშა იყო აღმართული — მოქალაქემ On.ge-სთან თქვა, რომ სახლი ჩაქვში მდებარეობს და გადაღებისას მას რუსი და ქართველი დაუპირისპირდა.