გადაცემა "ამ შაბათ-კვირას" წამყვანებმა, ლიკა ევგენიძემ და გიორგი შარვაშიძემ გადაცემის დახურვის შემდეგ ტელევიზიის ახალ შეთავაზებაზე, შუადღის გადაცემაში გადასულიყვნენ, უარი თქვეს და საზოგადოებრივი მაუწყებელი დატოვეს. ინფორმაციას Mediachecker ავრცელებს.

"მე და გიორგის შემოგვთავაზეს შუადღის გადაცემაში გადასვლა, მაგრამ უარი ვთქვით იმიტომ, რომ გადაცემა "ამ შაბათ-კვირას" დახურეს, ჩვენი პროდიუსერები გაუშვეს და ამის გამო ჩვენც აღარ გავაგრძელეთ მათთან კონტრაქტი," — განაცხადა ლიკა ევგენიძემ Mediachecker-თან საუბრისას.

შეგახსენებთ, 25 ივლისს გავრცელდა ინფორმაცია, რომ საზოგადოებრივმა მაუწყებელმა გადაცემა "ამ შაბათ-კვირას" დახურა. Mediachecker-ს გადაცემის პროდიუსერმა, თამარ ჭინჭარაულმა განუცხადა, რომ მას რადიოს გადაცემებზე გადასვლა შესთავაზეს, უარის თქმის შემთხვევაში კი, მიუთითეს, რომ მასთან ხელშეკრულება 1-ელი აგვისტოდან შეწყდებოდა.

მასთან ერთად შეთავაზებაზე უარი თქვეს მარიამ ფირცხალავამ, ნია ბარაბაძემ და ანა აბაკელიამ.

მეტი საზოგადოებრივი მაუწყებლის შესახებ:

"პირველ არხზე" დაიხურა გადაცემაც —"რეალური სივრცე". გადაცემის დახურვის შესახებ საზოგადოებრივმა მაუწყებელმა თანამშრომლებს 30 აპრილს წერილობით აცნობა. მანამდე, 11 აპრილს, არხიდან სარედაქციო პოლიტიკის კრიტიკის გამო გაათავისუფლეს გადაცემის წამყვანი, ნინო ზაუტაშვილი და საინფორმაციო გამოშვება "მოამბის" წამყვანი ვასილ ივანოვ-ჩიქოვანი. ამავე მიზეზით, დისციპლინური სანქციები დაუწესდა საზმაუს 4 თანამშრომელს: "რეალური სივრცის" ჟურნალისტ თამარ მშვენიერაძეს, ამავე გადაცემის წამყვან სოსო კაციტაძეს, პულტის რეჟისორ კახა მელიქიძეს და ბრენდინგისა და პრომოციის ჯგუფის რეჟისორ ირმა ჩუბინიძეს.

ამის შემდეგ, საზოგადოებრივი მაუწყებლის ხელმძღვანელობამ "რეპუტაციული ზიანის მიყენების" საფუძველზე 3 თანამშრომელს მისცა გაფრთხილება. ესენი არიან: გადაცემა "რეალური სივრცის" რედაქტორი ტუხა კვინიკაძე, "შაბათ-კვირის შოუს" კორესპონდენტი ანა აბაკელია და "შაბათ-კვირის შოუს" აღმასრულებელ პროდიუსერი თამარ ჯინჭარაული. სამივე მათგანის დისციპლინარული სანქციის ბრძანებაში წერია, რომ მიზეზი "საჯარო სივრცეში გავრცელებული განცხადებებით მაუწყებლის სარედაქციო დამოუკიდებლობისა და მიუკერძოებლობის ეჭვქვეშ დაყენება და ამის შედეგად, დამსაქმებლისთვის რეპუტაციული ზიანის მიყენებაა". ამავე საბაბით, საზოგადოებრივი მაუწყებლის გენერალურმა დირექტორმა სამსახურიდან შესაძლო გათავისუფლების შესახებ ტექნიკისა და ტექნოლოგიების მემონტაჟეთა და გრაფიკოსთა ჯგუფის მემონტაჟე-ოპერატორი, გივი კიტიაც გააფრთხილა.

ასევე იხილეთ: