ფემინისტი და ანტიპუტინისტი აქტივისტების რუსული პანკ ბენდის — Pussy Riot-ის ერთ-ერთი წევრის, ოლგა ბორისოვას განცხადებით, ის საქართველოში არ შემოუშვეს.

ოლგამ ტვიტერის პირად ანგარიშზე გამოაქვეყნა ინფორმაცია, რომლის თანახმადაც, ის ჯგუფის მუსიკალური ტურნედან საქართველოში ბრუნდებოდა (ის უკვე გარკვეული პერიოდია საქართველოში ცხოვრობს), მაგრამ აეროპორტიდან უკან გააბრუნეს.

"საქართველოში არ შემომიშვეს. მიზეზის ახსნის გარეშე. თბილისის გარდა სხვა სახლი არ მაქვს, ჩემი პარტნიორი იქ ცხოვრობს და ბინაც იქ მაქვს ნაქირავები. უკვე საქართველოდან სტამბოლში გამომაბრუნეს და იქიდან ამსტერდამში მიწევს დაბრუნება", — წერს ის.

Pussy Riot 2011 წელს მოსკოვში დაფუძნდა და მხოლოდ ქალებისგან შემდგარი ჯგუფი წლების განმავლობაში სხვადასხვა პერფორმანსით აპროტესტებდა რუსეთში ავტორიტარიზმს და ადამიანების უფლებების შელახვას, მათ შორის ქალებისა და ქვიარ ადამიანების მიმართ უთანასწორო მოპყრობას, რის გამოც ეს ბენდი ხშირად იდევნებოდა, მათ წევრებს კი აპატიმრებენ. ამის გამო ჯგუფის წევრების უმეტესობა ამჟამად რუსეთიდან გაქცეულია და სხვადასხვა ქვეყანაში ცდილობენ როგორც თავიანთი საპროტესტო შემოქმედებითი საქმიანობის გაგრძელებას, ისე — გადარჩენას.

მაგალითად, რუსეთის მიერ უკრაინაში შეჭრის შემდეგ ბენდის ერთ-ერთ წევრს, მარია ალიოხინას ანტისაომარი მოწოდებების გამო რუსეთში შინაპატიმრობა მიუსაჯეს. თუმცა ის ქვეყნიდან კურიერის ფორმაში გამოწყობილი გაიქცა: კურიერის ჩანთა მოირგო, სახლიდან გამოვიდა და ერთკვირიანი მგზავრობის შემდეგ ის ჯერ ბელორუსში, შემდეგ კი ლიეტუვაში გადავიდა.

საქართველოში ოლგა ბორისოვასთვის შემოსვლის აკრძალვის მიზეზების გასარკვევად On.ge შინაგან საქმეთა სამინისტროს დაუკავშირდა: უწყებაში გვითხრეს, რომ დეტალებს არკვევენ. მათ პასუხს მიღებისთანავე შემოგთავაზებთ.

ეს პირველი შემთხვევა არ არის, როდესაც საქართველოში პუტინის ხელისუფლებისადმი კრიტიკულად განწყობილ აქტივისტებს, პოლიტიკოსებს ან ჟურნალისტებს არ უშვებენ.

"იმედი მაქვს, ჩემს საყვარელ თბილისში დავბრუნდები და ჩემს შეყვარებულს და ქოთნებში გამხმარ ყვავილებს ჩავეხუტები", — წერს ოლგა ტვიტერზე.