ამის შესახებ გამოცემა Reuters ავრცელებს ინფორმაციას და წერს, რომ ყაზახეთმა ალტერნატიულ მარშრუტზე მას შემდეგ დაიწყო ფიქრი, რაც მოქმედ მარშრუტს საფრთხე შეექმნა.

რატომ არის მნიშვნელოვანი: ყაზახეთის ნავთობის ექსპორტი მსოფლიო მომარაგების 1%-ია, რაც ყოველდღიურად 1,4 მილიონი ბარელია.

  • ბოლო 20 წლის განმავლობაში, ყაზახეთიდან ნავთობის ექსპორტი კასპიის მილსადენით (CPC) ხდებოდა — შავ ზღვაზე რუსეთის ნოვოროსიისკის პორტის გავლით.
  • Reuters წერს, რომ ბოლო პერიოდში ამ მარშრუტს შეფერხებები აქვს. ივლისში რუსეთის სასამართლო დაემუქრა CPC-ის დახურვით, რამაც, როგორც გამოცემა აღნიშნავს, აიძულა ყაზახეთის მთავრობა და მსხვილი უცხოელი მწარმოებლები სიფრთხილის მიზნით დადონ კონტრაქტები სხვასთანაც.

დეტალები: Reuters წყაროზე დაყრდნობით წერს, რომ ყაზახეთის სახელმწიფო კომპანია Kazmunaigaz (KMG) ინტენსიურ მოლაპარაკებებს აწარმოებს აზერბაიჯანულ სოკართან, რათა ბაქო-თბილისი-ჯეიჰანის (BTC) მილსადენით ყოველწლიურად 1,5 მლნ ტონა ნავთობი გავიდეს ექსპორტზე.

  • გამოცემა ასევე წყაროებზე დაყრდნობით ამბობს იმასაც, რომ კონტრაქტის საბოლოო ვერსიას აგვისტოს ბოლოს მოეწერება ხელი. ტრანსპორტირება კი ერთი თვის შემდეგ დაიწყება.
  • Reuters წერს იმასაც, რომ შესაძლოა, 2023 წლიდან ბაქო-სუფსის ნავთობსადენის გამოყენებით ყაზახეთიდან დამატებით ყოველწლიურად 3,5 მლნ ტონა ნავთობი გაიტანონ.

ბაქო-თბილისი-ჯეიჰანის ნავთობსადენს, დღიურად 1,2 მლნ ბარელი ნავთობის ტრანსპორტირება შეუძლია, მისი სიგრძე 1768 კმ-ია.

  • BTC მარშრუტი ნიშნავს, რომ ყაზახეთს მოუწევს დაეყრდნოს მცირე ზომის ტანკერების ფლოტს, რათა თავისი ნავთობი აქტაუდან კასპიის ზღვის გავლით ბაქოში გადაიტანოს. Reuters წყაროზე დაყრდნობით წერს, მას შეზღუდული სათადარიგო სიმძლავრე აქვს.

არქივიდან: 18 ივლისს ლაიენმა და ალიევმა გაზის მიწოდების გაფართოებაზე მემორანდუმს მოაწერეს ხელი.

  • ურსულა ფონ დერ ლაიენი წერდა, რომ ერთობლივი შეთანხმებით EU იღებს ვალდებულებას, გააფართოონ სამხრეთ გაზის დერეფანი და გააორმაგონ გაზის მიწოდება აზერბაიჯანიდან ევროკავშირში.