ზაზა ხარებავას, შოთა ქადაგიძისა და ლევან გზირიშვილის განცხადებით, მათთვის საკმაოდ სამწუხაროა, რომ სასამართლო კორპუსი და იუსტიციის უმაღლესი საბჭო აქამდე თავს იკავებენ, აქტიურად არ ეხმიანებიან და შესაბამის შეფასებას არ აძლევენ მომხდარს, მხარდაჭერას არ უცხადებენ ლაშა ჩხიკვაძეს.

რატომ არის მნიშვნელოვანი: ნიკა გვარამიას საქმის მოსამართლე ლაშა ჩხიკვაძე აცხადებს, რომ განაჩენი გამოცხადების შემდეგ შეხვდა აშშ-ის საელჩოს თანამშრომელს, რომელმაც ჰკითხა საქმის ფაქტობრივი გარემოებები.

• მოსამართლემ დაადასტურა, რომ საელჩომ ის ნამდვილად ჩახსნა პროგრამიდან, რომლის ფარგლებშიც კვალიფიკაციის ასამაღლებლად ამერიკაში უნდა წასულიყო.

"აშშ-ში ვიზიტების ორგანიზების არასწორი პრაქტიკა": ისინი აცხადებენ, რომ გარდა უშუალოდ ამ ისტორიისა, აპირებენ ყურადღება, ზოგადად, კიდევ უფრო სამწუხარო გლობალურ და სისტემურ პრობლემებზე გაამახვილონ, რაც სწორედ მოსამართლეთა ვიზიტებს უკავშირდება.

• მათი თქმით, აშშ-ში მოსამართლეების ვიზიტების დაგეგმვის, ორგანიზების პროცესში სასამართლო სისტემის ადმინისტრირების ორგანოს, იუსტიციის უმაღლესი საბჭოს როლი პრაქტიკულად უგულვებელყოფილია.
• განცხადების მიხედვით, ამ მხრივ საბჭო დე ფაქტო იგნორირების პირობებში ფუნქციონირებს და არანაირი ვიზიტის ფორმატის, მასში მონაწილე მოსამართლეთა შემადგენლობის, თუ ქვეყნის ფარგლებში გამართული შეხვედრების მონაწილეთა სიის განსაზღვრაში ჩართული არაა.
• საბჭოს ყოფილი წევრების მტკიცებით, მოსამართლეებს ინდივიდუალურად უკავშირდებიან საელჩოდან და რთავენ დელეგაციებში, იუსტიციის საბჭო კი გამოიყენება მხოლოდ, როდესაც ვიზების მისაღებად შუამდგომლობას ითხოვს საელჩო.

"ფავორიტი მოსამართლეები": განცხადებაში ვკითხულობთ, სასამართლო სისტემაში არსებობენ ერთი და იმავე რანგის მოსამართლეები, რომლებიც კოლეგებისგან განსხვავებით არცერთი პროგრამით არ არიან ნამყოფი აშშ-ში, რაც არათანაბარი მიდგომის შთაბეჭდილებას ტოვებს.

• ამას გარდა, მათივე მტკიცებით, ლექცია-სემინარებზე ექსპერტებისა და ტრენერების შერჩევაშიც ანალოგიური ცალმხრივი დამოკიდებულებაა, რაც გარკვეული ფავორიტიზმის ნიშნებს ატარებს.
• საბჭოს ყოფილი წევრები ამბობენ, რომ ბოლო წელებია თითქმის სულ ერთი და იგივე 5-7 მოსამართლეა მათი ღონისძიებების ექსპერტებად და ტრენერებად.
• მათივე თქმით, სისტემაში 300-ზე მეტი მაღალკვალიფიციური მოსამართლეა, რომელთაგან მაღალი დონის ექსპერტთა შერჩევა შეიძლება.

განცხადების მიხედვით, აშშ-ის ელჩი იუსტიციის საბჭოსთან, თავმჯდომარესთან, მდივანთან კომუნიკაციის გარეშე სტუმრობს ხოლმე სასამართლოებს, ხვდება მოსამართლეებს, ამით კი სისტემის ადმინისტრირების რგოლის, ხელმძღვანელობის როლის დაკნინება ხდება.

• ისინი, ასევე, აღნიშნავენ, რომ მთელი ამ პერიოდის განმავლობაში ელჩი იუსტიციის უმაღლესი საბჭოს შემადგენლობას ერთხელაც კი არ შეხვედრია, არ დაინტერესებულა იმ პრობლემატიკით, რაც სისტემის წინაშე არსებობს.
• მათივე თქმით, ეს "რბილად რომ თქვან" უცნაური და სამწუხაროა.

საბოლოოდ, ყოფილი წევრების აზრით, იუსტიციის საბჭოს ამგვარი "დე ფაქტო" იგნორირება კიდევ უფრო მეტ შეკითხვას ბადებს და ამ ორგანოს როლის ხელოვნურად დაკნინების აშკარა ნიშნებს შეიცავს.

• მათივე თქმით, სასამართლო დაცული უნდა იყოს პირდაპირი და ირიბი ჩარევის ყოველგვარი მცდელობისგან ნებისმიერი მხრიდან, იქნება ეს ხელისუფლება, კერშო ორგანიზაციები, თუ საერთაშორისო პარტნიორები თუ დონორები.

კონტექსტი: სასამართლო სისტემაში არსებული ხარვეზებისკენ საერთაშორისო პარტნიორებს, ორგანიზაციებს არაერთხელ მიუთითებიათ და გაუციათ რეკომენდაციები.

• არასამთავრობო ორგანიზაციებისა და ოპოზიციური პარტიების მხრიდან არაერთხელ გაკეთებულა განცხადება იმაზე, რომ ხელისუფლება სისტემას აკონტროლებს და მოსამართლეები პოლიტიკურად მოტივირებულ გადაწყვეტილებებს იღებენ.