ქართული ოცნების თავმჯდომარის განცხადებით, პარლამენტი საკონსტიტუციო ცვლილებას კანდიდატის სტატუსიდან ერთ თვეში მიიღებს. მისი თქმით, 2024 წლის და მომდევნო საპარლამენტო არჩევნები სრულად პროპორციული სისტემით და 2%-იანი საარჩევნო ბარიერით ჩატარდება.

რატომ არის მნიშვნელოვანი: მოქმედი კანონმდებლობით საპარლამენტო არჩევნებისთვის ბარიერი 5%-ია.

• ოპოზიცია და სამოქალაქო საზოგადოება რამდენიმე წელია ითხოვს საარჩევნო ბარიერის დაწევას.
• ISFED-ის განცხადებით, 5%-იანი ბარიერის გამოყენება დაკავშირებულია არაერთ რისკთან, რაც უარყოფითად აისახება პოლიტიკური სისტემის განვითარებაზე.

დეტალები: კობახიძე ამბობს, რომ ევროპული საბჭოსა და ევროპული კომისიის წინაშე საპარლამენტო უმრავ პარტიის პოლიტიკური საბჭოს და საპარლამენტო უმრავლესობის სახელით, იღებენ პოლიტიკურ ვალდებულებას.

• "ღრმად გვწამს, რომ საქართველოს მიერ კანდიდატის სტატუსის მიღება ხელს შეუწყობს ქვეყანაში პოლარიზაციის ხარისხის შემცირებას, რის შემდეგაც სრულად პროპორციული საარჩევნო სისტემა 2%-იანი საარჩევნო ბარიერით 2024 წელს ქვეყნისთვის ოპტიმალურ პოლიტიკურ მოცემულობას შექმნის".
• "დარწმუნებული ვართ, ნაციონალურ მოძრაობას თავისი სატელიტებით 2024 წელს 2%-იანი ბარიერის პირობებშიც პირწმინდად დავამარცხებთ, რაც ჩვენი ქვეყნის მშვიდობიანი, დემოკრატიული და სტაბილური განვითარების აუცილებელი პირობაა".

კონტექსტი: საარჩევნო სისტემის ცვლაზე დაპირება აქამდეც მოგვისმენია — ჯერ კიდევ 2019 წელს ბიძინა ივანიშვილი ირწმუნებოდა, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

• შესაბამისად, "ოცნებამ" მოამზადა კანონპროექტი, რომელიც არჩევნების ნულოვანი ბარიერით ჩატარებას გულისხმობდა, თუმცა, თავადვე ჩააგდეს.
• მაშინ პროექტის ინიციატორი 93 დეპუტატიდან, 35-მა "ამბოხებულმა" პოზიცია შეიცვალა.
• რამდენიმე კვირიანი პროტესტის შემდეგ, ოპოზიციასა და მმართველ გუნდს შორის დიპლომატების მედიატორობით მოლაპარაკებები დაიწყო, რომელიც, საბოლოოდ, 2020 წლის 8 მარტის შეთანხმებით დასრულდა.
• ამ შეთანხმების მიხედვით, იმავე წელს საპარლამენტო არჩევნები 120/30-ზე მანდატების თანაფარდობით ჩატარდა.

შარლ მიშელის შეთანხმება: 2021 წელს ახალ პოლიტიკურ კრიზისში აღმოვჩნდით, რომლის მოგვარების მცდელობა ევროპული საბჭოს პრეზიდენტს, შარლ მიშელს ჰქონდა.

• არაერთი მრავალსაათიანი შეხვედრის, კრიტიკის და დოკუმენტის სხვადასხვა ვერსიის დაწუნების შემდეგ, 19 აპრილს მიშელის მედიაციით შექმნილ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა მოაწერა ხელი.
• შეთანხმების საფუძველზე შემუშავებული კანონპროექტის მიხევდით, მომავალ ორ საპარლამენტო არჩევნებში ბარიერი ბუნებრივსა და 2%-ს შორის უნდა ყოფილიყო.
• თუმცა, ქართულმა ოცნებამ მიშელის შეთანხმება ანულირებულად გამოაცხადა.
• მოგვიანებით კობახიძემ თქვა, რომ 2%-იანი საარჩევნო ბარიერი მათ "კეთილ ნებაზე იქნება დამოკიდებული".
• "რაც შეეხება 2%-იან ბარიერს, უკეთესია თუ არა ეს 5%-იანზე ამაზეც არავითარი სიღრმისეული მსჯელობა არ ყოფილა, შეიძლება უარესიც არის", — ამბობდა კობახიძე 2021 წლის ნოემბერში.