იაკობა ბალარდმა 2014 წელს დნმ-ის ტესტი გაიკეთა და შედეგმა მისი ცხოვრება თავდაყირა დააყენა. ამერიკელმა ქალმა შემთხვევით გაიგო, რომ მისი ბიოლოგიური მამა ექიმი და ცნობილი სპეციალისტი დონალდ კლაინია, რომელთანაც დედამისი 1979 წელს უშვილობის გამო მკურნალობდა.

ამ ფაქტის გაგების შემდეგ იაკობა ბალარდმა კვლევა დაიწყო და მან უკვე 93 ბიოლოგიური და-ძმა იპოვა, თუმცა ის ვარაუდობს, რომ მათი რაოდენობა გაცილებით მეტია. დნმ-ის ტესტის ჩატარების შემდეგ ქალმა ექიმის საქმიანობის შესწავლა დაიწყო და იმ ადამიანებს მიაგნო, რომლებმაც უშვილობის გამო სწორედ მას მიმართეს. ბალარდმა მათ შვილებს დნმ-ის ტესტის გაკეთება სთხოვა და ექიმი სწორედ ამ გზით ამხილა.

ექიმ კლაინის საქმიანობაზე Netflix-მა ფილმი, სახელად Our Father, გადაიღო. ფილმში ბალარდი და ექიმის სხვა ბიოლოგიური შვილები საკუთარი ისტორიისა და ემოციების შესახებ საუბრობენ. ასევე ფილმში სხვადასხვა დეტალი ხდება ცნობილი, მათ შორის ის, რომ ექიმი ქალებს საკუთარი სპერმის გამოყენების შესახებ არაფერს ეუბნებოდა.

ბალარდის დედის თქმით, ექიმი მას შეუთანხმდა, რომ დონორის სპერმას გამოიყენებდა. ზოგ შემთხვევაში კი ქალები ფიქრობდნენ, რომ განაყოფიერებისას ექიმი მათი ქმრების სპერმას იყენებდა, თუმცა ეს ასე არ იყო.

ფოტო: Netflix

ბალარდი თავდაპირველად საკუთარ ბიოლოგიურ მამას ტელეფონზე ესაუბრა, რისი ჩანაწერების მოსმენაც ნეტფლიქსის ფილმში შესაძლებელია. ექიმი, რომელმაც ბალარდის დედის დასაორსულებლად საკუთარი სპერმა გამოიყენა, მას სთხოვდა, რომ მედიასთან თანამშრომლობა შეეწყვიტა, თუმცა საკუთარ საქციელს არც კი ნანობდა. ბალარდმა კი ეს ყველაფერი გაასაჯაროვა და მასთან სამართლებრივი დავა წამოიწყო.

ბალარდმა და ექიმის სხვა ბიოლოგიურმა შვილებმა ინდიანას შტატში მოითხოვეს, რომ კლაინისთვის ბრალი წაეყენებინათ. პროკურორების თქმით, ექიმს ბრალს ვერც სექსუალურ ძალადობასა და ვერც ფიზიკური ზიანის მიყენებაში ვერ წაუყენებდნენ. მიუხედავად იმისა, რომ დნმ-ის ტესტის შედეგებით კლაინი ყველა მოსარჩელეს ბიოლოგიური მამა აღმოჩნდა, ექიმმა მამობაზე უარი განაცხადა.

ფოტო: Getty Images

მოგვიანებით კლაინს ბრალი პაციენტების მოტყუების გამო წაუყენეს და სასამართლო პროცესზე მან დანაშაული აღიარა. კლაინი მხოლოდ 500 დოლარით დაჯარიმდა და მას 1 წლით თავისუფლების აღკვეთაც მიუსაჯეს, თუმცა განაჩენი მისი ასაკისა და იმ ხალხის პროტესტის გამო გაუქმდა, რომლებიც ექიმს იცავდა.

ინდიანას, კენტუკის და ტეხასის შტატის სამართლებრივი ორგანოების განცხადებით, ექიმ კლაინის საქმიანობა უკანონო იყო, მაგრამ არ არსებობს შესაბამისი ფედერალური კანონი, რომელიც მას გაასამართლებს.