პოლიციის დღისადმი მიძღვნილ ღონისძიებაზე პრეზიდენტმა ფემიციდის შემთხვევებზე ისაუბრა. სალომე ზურაბიშვილმა აღნიშნა, რომ ამ მიმართულებით ბევრი რამ გაკეთდა და ოჯაში ძალადობისას ქალები პოლიციაში მიმართვისას უფრო დაცულად გრძნობენ თავს, მაგრამ უფრო მეტია სამუშაო.

"მართალია, ზოგ-ზოგიერთებს არ უყვართ სიტყვა სამარცხვინოა, მაგრამ ჩემთვის და ვიცი რომ თქვენთვისაც, სამარცხვინო არის დღეს, რომ საქართველოში ხდება კიდევ ის სასტიკი ქალთა მკვლელობა ბავშვების თვალების წინაშე.

ვიცი, რომ ამას თქვენც არ მოითმენთ. თქვენთვისაც ეს არის ძალიან დიდი გამოწვევა და ვიცი, რომ ამ კუთხით უკვე ძალიან ბევრი რამ გაკეთდა, უკვე ბევრად უფრო დაცულად გრძნობენ თავს ქალები, როცა მიდიან პოლიციასთან და იციან, რომ ამას მოყვება შემაკავებელი ორდერი და ეს უკვე აღარ არის გამონაკლისი. მაგრამ ისიც ვიცით, თქვენც და მეც და ყველამ, რომ კიდევ ძალიან ბევრი არის გასაკეთებელი ამ მიმართულებით, იმისთვის, რომ ეს საქართველოში აღარ მოხდეს", — განაცხადა მან.

პრეზიდენტმა მიმართა შინაგან საქმეთა სამინისტროს, მთავრობას, პარლამენტს და განაცხადა, რომ ამ მიმართულებით ყველამ ერთად უნდა იმუშაოს, ოჯახში ძალადობა უნდა ჩაბარდეს წარსულს და მაშინ ვიქნებით ნამდვილად თანამედროვე, ცივილიზებული, დემოკრატიული ქვეყანა.

"ეს აღარ უნდა დავუშვათ და ეს არის ჩვენი ერთობლივი მიმართულება, რომ ამისკენ ყველა ნაბიჯი გადავდგათ, ყველა ზომა მივიღოთ. ეს იქნება მთავრობა, პარლამენტი, თუ თქვენი შიდა გადაწყვეტილება, ყველანაიარად უნდა ვეცადოთ, რომ იმას მიაღწიოთ, რომ ოჯახში ძალადობა ჩაბარდეს წარსულს და მაშინ ვიქნებით ნამდვილად თანამედროვე, ცივილიზებული, დემოკრატიული ქვეყანა და ეს იქნება თქვენი დამსახურება", — განაცხადა პრეზიდენტმა.

ბოლო ერთი თვის განმავლობაში საქართველოში ერთი ქალი მოკლეს, ერთი კი დაჭრეს. რადიო თავისუფლების ინფორმაციით, ცოლის დაჭრაში ბრალდებულ კაცს შემაკავებელი ორდერი ჰქონდა გამოწერილი.

გარდა ამისა, პოლონეთში ქმარმა მოკლა საქართველოს მოქალაქე ქალი, რომელსაც ასევე შემაკავებელი ორდერი ჰქონდა.

მნიშვნელოვანია ვიცოდეთ, რომ კანონით შესაძლებელია, მოძალადე განარიდონ მსხვერპლის საცხოვრებელი ადგილიდან იმ შემთხვევაშიც, როდესაც საცხოვრებლის მესაკუთრე მოძალადეა. ასევე, შესაძლებელია მსხვერპლისა და მისი არასრულწლოვანი შვილის სახელმწიფო თავშესაფარში გადაყვანა.

ოჯახში ძალადობა არ გულისხმობს მხოლოდ ფიზიკურ შეხებას. ოჯახის წევრის მხრიდან ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა ასევე ძალადობაა და კანონით აკრძალულია.

ოჯახში ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა. საკონსულტაციო მომსახურების გაწევის მიზნით ფუნქციონირებს ცხელი ხაზი: 116 006. შესაძლებელია 112-ის აპლიკაციის გადმოწერაც, სადაც ღილაკზე SOS დაჭერით პოლიციასთან შეტყობინება შევა და სამართალდამცველები ლოკაციის მიხედვით გიპოვიან. აღსანიშნავია ისიც, რომ არსებობს არაერთი არასამთავრობო ორგანიზაცია, რომლებიც ოჯახში ძალადობის მსხვერპლებს სხვადასხვა ტიპის დახმარებას უფასოდ სთავაზობენ.