"ცილის მიღება შეიძლება ციხეშიც", — ამის შესახებ ქართული ოცნების დეპუტატმა, გიორგი ამილახვარმა მიხეილ სააკაშვილზე საუბრისას განაცხადა. როგორც ის ამბობს, სურთ ექსპრეზიდენტი კანონის გვერდის ავლით გამოუყვანონ ციხიდან და აქ საუბარი სააკაშვილის ჯანმრთელობაზე არ არის.

"იმისთვის რომ ადამიანმა მიიღოს ცილა, რომლის ნაკლებობასაც ახლა ის განიცდის, ამ დასკვნების შესაბამისად, ამისთვის მისი საზღვარგარეთ გადაყვანა არაა საჭირო. ცილის მიღება შეიძლება ციხეშიც, ციხის საავადმყოფოშიც, ან ნებისმიერ სხვა ადგილას, თუ ამის საჭიროება იქნება [...] ეს არის პოლიტიზირებული საკითხი, არ არის საუბარი მის ჯანმრთელობაზე, უნდათ, რომ კანონის გვერიდს ავლით გამოიყვანონ ციხიდან", — ამბობს ის.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

გუშინ, 28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ამავე თემაზე: