თბილისის აეროპორტში პოლიციამ ჩინეთის ორი მოქალაქე თვითმფრინავის ბორტზე მომხდარი ქურდობის ბრალდებით დააკავა.

სამართალდამცველების ცნობით, ბრალდებულებმა ფრენის დროს ორ თანამგზავრს დიდი ოდენობით თანხა — 7 800 აშშ დოლარი და 4 450 ევრო მოპარეს. პოლიციამ დანაშაული ცხელ კვალზე გახსნა, ეჭვმიტანილები აეროპორტის ტერიტორიაზევე დააკავა, ხოლო მოპარული ფული სრულად ამოიღო.

საქმეზე გამოძიება სისხლის სამართლის კოდექსის შესაბამისი მუხლით მიმდინარეობს, რაც 10 წლამდე ვადით თავისუფლების აღკვეთას ითვალისწინებს.

"შინაგან საქმეთა სამინისტროს თბილისის პოლიციის დეპარტამენტის ისანი-სამგორის მთავარი სამმართველოს თანამშრომლებმა, ქურდობის ბრალდებით ჩინეთის სახალხო რესპუბლიკის 2 მოქალაქე დააკავეს.

გამოძიებით დადგინდა, რომ ბრალდებულები ერთ-ერთი ავიარეისით მგზავრობისას, თვითმფრინავის ბორტზე მყოფი ორი მგზავრის კუთვნილ 7 800 აშშ დოლარსა და 4 450 ევროს მართლსაწინააღმდეგოდ დაეუფლნენ.

სამართალდამცველებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად დანაშაულის ჩამდენი პირების ვინაობა მალევე დაადგინეს და ისინი აეროპორტის ტერიტორიაზევე ბრალდებულების სახით დააკავეს.
სამართალდამცველებმა ნაქურდალი თანხა ნივთმტკიცებად ამოიღეს.

გამოძიება სისხლის სამართლის კოდექსის 177-ე მუხლის მეოთხე ნაწილით მიმდინარეობს, რაც 10 წლამდე ვადით თავისუფლების აღკვეთას ითვალისწინებს", — წერია უწყების განცხადებაში.