ქართული ოცნების თავმჯდომარემ, ირაკლი კობახიძემ ექსპრეზიდენტის ჯანმრთელობის მდგომარეობაზე ირონიულად ისაუბრა. მისი თქმით, მიხეილ სააკაშვილმა უნდა ჭამოს კვერცხი, ხაჭო და პრობლემა დამთავრდება.

"მარტივად გვაქვს აქ საქმე — შეუძლია მიიიღოს ცილა და არ იღებს ცილას. კეთილი ინებოს, მიიღოს და დამთავრდება ამით ყველაფერი.

ვერ იღებს რას ჰქვია, ან არ იღებს რას ჰქვია. თუ არ იღებს, ეს არის შიმშილის ერთგვარი ფორმა ხომ? არ აქვს ეს გამოცხადებული, შესაბამისად არ უნდა გამოვრიცხოთ. რაც შეეხება ვერ იღებს, არ ვიცი რატომ ვერ უნდა ჭამდე ხაჭოს ან კვერცხს ადამიანი. ეს მე არ ვიცი. ამ დეტალებში ნამდვილად ვერ შევალ. რატომ შეიძლება ჭამდე შოკოლადს და არა ხაჭოს, ამ დეტალებში შესვლა ნამდვილად არ შემიძლია", — ამბობს პარტიის თავმჯდომარე.

გარდა ამისა, მან ირონიულად აღნიშნა, რომ სააკაშვილმა "იმდენხანს იმგზავრა რძის პროდუქტებთან ერთად, ალბათ, განზიდვა აქვს ამ პროდუქტების მიმართ", თუმცა იქვე დაამატა, რომ ეს ხუმრობაა და "ეს შეიძლება წინასწარ განზარხვული გეგმა იყოს".

"ჭამოს კვერცხი, ხაჭო, დამთავრდება პრობლემა. პოლიტიკური განცხადება აქ ვერ გაკეთდება. მე მგონია, რძის პროდუქტებთან ერთად იმდენხანს იმგზავრა, რომ ეტყობა განზიდვა აქვს ამ პროდუქტის მიმართ. ეს ხუმრობით, მაგრამ სინამდვილეში, საქმე იმაშია, რომ ეს შეიძლება იყოს ძალიან მარტივი წინასწარ განზარხვული გეგმა", — თქვა მან.

28 აპრილს ექსპრეზიდენტის ოჯახმა განაცხადა, რომ მთავრობას სააკაშვილის საზღვარგარეთ სამკურნალოდ გადასაყვანად დროს ორშაბათას, 2 მაისამდე აძლევენ. მათივე თქმით, ამავე მოთხოვნით ისინი ხელმოწერების შეგროვებასაც იწყებენ.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

ამავე თემაზე: