ნაციონალური მოძრაობის თავმჯდომარე ნიკა მელია ამბობს, რომ სალომე ზურაბიშვილი მიხეილ სააკაშვილის გათავისუფლებისა და საზღვარგარეთ ჰოსპიტალში გადაყვანასთან დაკავშირებით პოლიტიკურად გაუმართლებელ განცხადებებს აკეთებს.

"მიხეილ სააკაშვილის გათავისუფლების, ტყვეობიდან საზღვარგარეთ ჰოსპიტალში გადაყვანის პროცესში ჩართულობა არის ადამიანური და პოლიტიკური კუთხიდანაც აუცილებელი.

ქალბატონმა ზურაბიშვილმა გააკეთა ორივე მხრივ არასწორი განცხადებები და ამას იგი, დარწმუნებული ვარ, ძალიან მალე მიხვდება. მას აქვს ის შესაძლებლობა, რომ ქვეყანას აარიდოს კიდევ უფრო არასტაბილურად განვითარების პერსპექტივა, რომლის წინაშეც ჩვენ ვდგავართ. თხელ ყინულზე დადის მთელი ერი და როდის ჩატყდება არავინ იცის. ქალბატონ ზურაბიშვილს აქვს ის უფლება, რომ მიხეილ სააკაშვილი გადაარჩინოს სიკვდილს და აკეთებს არაადამიანურ და პოლიტიკურად გაუმართლებელ განცხადებებს.

რა თქმა უნდა, ქალბატონი ზურაბიშვილის იმედზე არ ვაპირებთ ყოფნას ჩვენ, ნაციონალური მოძრაობა და საზოგადოების საღი ნაწილი. თუკი ვინმე ამ განცხადებებით, ნაბიჯებით დაზარალდება, ეს იქნება თავად ქალბატონი ზურაბიშვილი", — ამბობს მელია.

პრეზიდენტმა, სალომე ზურაბიშვილმა Foreign Policy-სთან ინტერვიუში თქვა, რომ არ ფიქრობს, სააკაშვილი დღეს ძალიან მნიშვნელოვანი საკითხია.