ივნისში, ბიოლოგი დანიელ ბლუმშტეინი კოლორადოს შტატის ქალაქ გოთიკის ველზე იჯდა და ვირზაზუნას გამოჩენას ელოდა. მღრღნელი არსად ჩანდა, რის გამოც მეცნიერი ფიქრებს მიეცა.

სამეცნიერო კვლევების სახელმწიფო დაფინანსების შემცირების გამო შეწუხებულ მეცნიერს იდეაც იქვე დაებადა: იქნებ სერიალ Margo’s Got Money Troubles-ის სიუჟეტი — მარტოხელა დედაზე, რომელიც ოჯახის შესანახად ზრდასრულთა კონტენტის პლატფორმას, OnlyFans-ს მიმართავს — ვირზაზუნებსა და სამეცნიერო კვლევების დაფინანსებასაც მოერგოს?

ლაბორატორიაში დაბრუნებულმა დოქტორმა ბლუმშტეინმა ეს იდეა კოლეგებს გაუზიარა. გამოხმაურება არაერთგვაროვანი იყო, თუმცა ერთ-ერთმა მაგისტრანტმა პროფილისთვის შესანიშნავი სახელი მოიფიქრა: OnlyMarms.

ფოტო: iStock

"ეს იქნება სრულიად უწყინარი კონტენტი, ამის სექსუალიზებას არ ვაპირებთ. ჩვენ უბრალოდ გვინდა, გართობითა და ხალისით გავუზიაროთ ხალხს ჩვენი დაკვირვებები" — განაცხადა UCLA-ის პროფესორმა, დოქტორმა ბლუმშტეინმა.

ანგარიში, რომელზეც ველური ვირზაზუნების სოროების თხრისა თუ კლდეებზე სირბილის ამსახველი ვიდეოები თავსდება, უფასოდაც ხელმისაწვდომია, თუმცა გვერდი იღებს დონაციებს, რომლებიც დოქტორი ბლუმშტეინისა და მისი გუნდის საველე კვლევების დაფინანსებას ხმარდება.

მკვლევრები სწავლობენ ვირზაზუნების ქცევასა და გენეტიკურ ხაზებს, რათა გაიგონ, მაგალითად, როგორ რეაგირებენ ძუძუმწოვრები გარემოს ცვლილებებზე.

მეცნიერები კოლორადოს შტატში მდებარე კლდოვანი მთების ბიოლოგიურ ლაბორატორიაში მუშაობენ, სადაც რეგიონის ყვითელმუცელა ვირზაზუნებზე დაკვირვება ჯერ კიდევ 1962 წლიდან მიმდინარეობს.

ფოტო: Jeff Pflueger/The New York Times

ამ ეტაპზე ანგარიშს დაახლოებით 2 900 ვიზიტორი და 112 გამომწერი ჰყავს, რაც შეეხება დონაციას — კვლევების გასაგრძელებლად საჭირო თანხა ჯერჯერობით არ შეგროვებულა.

გუნდმა საგრანტო განცხადებების მიუხედავად, დაფინანსების მოპოვება ვერ შეძლო. პროგრამის შესანარჩუნებლად, ბლუმშტეინმა და მისმა კოლეგებმა პირადი დანაზოგებიც გამოიყენეს, თუმცა, სავარაუდოდ, ეს საკმარისი მაინც არ იქნება.

დოქტორ ბლუმშტეინის კვლევისთვის შექმნილი საფრთხე ფედერალური დაფინანსების გადახედვის შედეგია. ტრამპის ადმინისტრაციამ გაათავისუფლა თანამშრომლები ფედერალურ სამეცნიერო სააგენტოებში, შეამცირა კვლევითი პროგრამები, გააუქმა გრანტები და დაასანქცირა უნივერსიტეტები.

მეცნიერების საკითხებში პრეზიდენტ ტრამპის მრჩეველმა განაცხადა, რომ ადმინისტრაცია ამიერიდან პრიორიტეტს მიანიჭებს ხელოვნურ ინტელექტს, რობოტექნიკასა და ბირთვულ ენერგეტიკას, ხოლო ნაკლებ ყურადღებას დაუთმობს სიცოცხლის შემსწავლელი მეცნიერებებს.

იხილეთ პროექტის ინსტაგრამ გვერდი და დონაციის მისამართი.