ნავთობით დაწყებული, სოციალური მედიით, მუსიკით, YouTube-ითა და ბიტკოინით დამთავრებული — თითოეული ინდუსტრიის პირველ მილიარდერებს თუ დავაკვირდებით, მკაფიო კანონზომიერების შემჩნევა შეგვიძლია: მასშტაბური სიმდიდრე იშვიათად გროვდება მხოლოდ ხელფასით, ის საკუთარი რესურსების მაქსიმალურად ეფექტიანი გამოყენების შედეგია.

აი, ადამიანები, რომლებიც თავიანთი ინდუსტრიების პირველი მილიარდერები გახდნენ:

1. ჯონ როკფელერი

მსოფლიოში პირველი მილიარდერი (ნავთობის ინდუსტრია)

როკფელერი მსოფლიოში პირველი მილიარდერი გახდა მას შემდეგ, რაც Standard Oil-ის საშუალებით ნავთობინდუსტრიაზე კონტროლი მოიპოვა — მისი კომპანია ნავთობს მოიპოვებდა, ამუშავებდა და დისტრიბუციასაც თავად ეწეოდა.

2. ბილ გეიტსი

პირველი მილიარდერი ტექნოლოგიებში

Microsoft-ის დამფუძნებელი ბილ გეიტსი მსოფლიოში პირველი ადამიანია, რომელიც მილიარდერი ტექნოლოგიების სფეროში გახდა. პერსონალური კომპიუტერების გავრცელებასთან ერთად, Microsoft-ის პროგრამა ინდუსტრიის სტანდარტად იქცა, რამაც კომპანიას უზარმაზარი და სტაბილური შემოსავალი მოუტანა.

3. ჯეფ ბეზოსი

პირველი ინტერნეტმილიარდერი

ჯეფ ბეზოსმა ინტერნეტის სწრაფი ზრდა ჯერ კიდევ 1990-იანი წლების დასაწყისში შეამჩნია და ეს შესაძლებლობა იმდენად კარგად გამოიყენა, რომ 34 წლის ასაკში პირველი ინტერნეტ-მილიარდერი გახდა.

ბეზოსის შექმნილი Amazon თავდაპირველად ონლაინ წიგნების მაღაზია იყო, თუმცა უწყვეტმა რეინვესტირებამ და საქმისადმი თავდადებამ ის ვირტუალური წიგნის მაღაზიიდან ყველაფრის მაღაზიად აქცია.

4. მარკ ზაკერბერგი

პირველი მილიარდერი სოციალური მედიიდან

პირველი სოციალური ქსელები ანონიმურობასა თუ შემთხვევით კავშირებზე იყო ორიენტირებული, თუმცა Facebook რეალურ იდენტობებსა და ურთიერთობებზე აიგო. ამან პლატფორმა უფრო სანდო და მიმზიდველი გახადა.

გარდა ამისა, პლატფორმის დამფუძნებელი მარკ ზაკერბერგი ჭკვიანურად მოიქცა, როცა კონკურენტები — WhatsApp და Instagram შეიძინა, რითაც სოციალურ მედიაში დომინირება შეინარჩუნა.

5. სტივენ სპილბერგი

პირველი მილიარდერი შოუბიზნესიდან

რეჟისორი სტივენ სპილბერგი 1994 წელს გახდა პირველი მილიარდერი გასართობი ინდუსტრიიდან. მან ამ ისტორიულ ნიშნულს ისეთი საკულტო ფილმების შექმნით მიაღწია, როგორებიცაა Jaws, E.T. და Jurassic Park.

6. ჯოან როულინგი

პირველი მილიარდერი მწერალი

ჯოან როულინგი პირველი მწერალია, რომელმაც მილიარდერის სტატუსს მიაღწია — მან Forbes-ის უმდიდრეს ადამიანთა სიაში ადგილი 2004 წელს, ჰარი პოტერის წიგნების სერიის წყალობით დაიკავა. 2012 წელს როულინგმა, მას შემდეგ, რაც ასობით მილიონი დოლარი ქველმოქმედებას მოახმარა, მილიარდერთა რეიტინგი დროებით დატოვა.

7. მაიკლ ჯორდანი

პირველი მილიარდერი სპორტსმენი

მაიკლ ჯორდანი ისტორიაში პირველი მილიარდერი სპორტსმენია. ჯორდანმა ამ ნიშნულს 2014 წელს მიაღწია, რაც დიდწილად განაპირობა მისმა უზარმაზარმა ბიზნეს თანამშრომლობებმა, მათ შორის Nike-თან პარტნიორობამ.

8. Jay-Z

პირველი მილიარდერი რეპერი

ჯეი-ზი გასართობი ინდუსტრიის მილიარდერების მოკლე სიაში შედის, ამასთან ერთად კი, პირველი ჰიპ-ჰოპ არტისტია, რომელიც მილიარდერი გახდა. ჯეი-ზი ფლობს დიდი ოდენობით უძრავ ქონებას, მისი სიმდიდრე მოიცავს ხელოვნების კოლექციებსა და ისეთ მუსიკალურ ბიზნესებს, როგორიცაა Tidal და Roc Nation.

9. ტეილორ სვიფტი

პირველი მუსიკოსი, რომელიც მხოლოდ მუსიკით გახდა მილიარდერი

ტეილორ სვიფტი პირველი მუსიკოსია, რომელმაც მილიარდერის სტატუსს მხოლოდ საკუთარი მუსიკისა და კონცერტების წყალობით მიაღწია და არა სხვა ბიზნესსაქმიანობით. ის მილიარდერთა რიგებს ოფიციალურად 2023 წელს შეუერთდა.

10. ტაილერ და კამერონ უინკლევოსები

პირველი ბიტკოინ მილიარდერები

ტაილერ და კამერონ უინკლევოსები მსოფლიოში პირველი საჯაროდ ცნობილი ბიტკოინ მილიარდერები არიან. მათ ამ ნიშნულს 2017 წლის დეკემბერში მიაღწიეს, როდესაც ბიტკოინის ფასმა $11 000-ს გადააჭარბა, რამაც მათ მიერ ადრეულ ეტაპზე შეძენილი კრიპტოვალუტის პორტფელის ღირებულება მკვეთრად გაზარდა.

11. MrBeast

პირველი მილიარდერი იუთუბერი

ჯიმი დონალდსონი, იგივე MrBeast, ისტორიაში პირველი იუთუბერია, რომლის ქონებამაც $1 მილიარდს გადააჭარბა. ვიდეოების ნახვებით მიღებული შემოსავალი MrBeast-მა ფიზიკური პროდუქტებისა და გასართობი პლატფორმების დასაფინანსებლად გამოიყენა. ამ ფაქტმა ყველანაირი წარმოდგენა შეცვალა იმაზე, თუ რისი მიღწევა შეუძლია კონტენტის შემქმნელ ადამიანს.