საქართველოში საერთაშორისო და შიდასახელმწიფოებრივი გზების მოვლა-შენახვას ამიერიდან ახალი სახელმწიფო საწარმო — შპს "საქართველოს გზების ოპერატორი" უზრუნველყოფს. ირაკლი კობახიძის N1586 განკარგულებით, კომპანიის 100%-იანი წილი მართვის უფლებით, უსასყიდლოდ და განუსაზღვრელი ვადით ინფრასტრუქტურის სამინისტროს გადაეცა. ინფორმაციას BM.GE ავრცელებს.

გადაწყვეტილების აღსასრულებლად საჭირო პროცედურებს ეკონომიკის სამინისტროს სსიპ ქონების ეროვნული სააგენტო განახორციელებს.

ბიზნესრეესტრის მონაცემებით, უწყებას სრულიად ახალი იურიდიული პირის დაფუძნების ნაცვლად, არსებული სახელმწიფო კომპანიის რებრენდინგი დასჭირდა.

BM.GE-ის ცნობით, იგივე საიდენტიფიკაციო კოდით მოქმედი საწარმო 2012 წლიდან არსებობს და აქამდე "შპს ქუთაისის დავით აღმაშენებლის სახელობის საერთაშორისო აეროპორტის" სახელით ფუნქციონირებდა (რომლის 100%-ს "საქართველოს აეროპორტების გაერთიანება" ფლობდა).
2026 წლის 21 ივლისს კომპანიის მესაკუთრე პირდაპირ სახელმწიფო გახდა, ხოლო 22 ივლისს მას სახელი შეეცვალა და "საქართველოს გზების ოპერატორი" ეწოდა. კომპანიის დირექტორად ალექსანდრე ზაბახიძე დაინიშნა.

გზების მოვლა-პატრონობისთვის სპეციალური სახელმწიფო კომპანიის შექმნის შესახებ ინიციატივა 2026 წლის ივნისში გახდა ცნობილი.

საკანონმდებლო ცვლილებების მიხედვით, საწარმოს ტექნიკური აღჭურვისთვის, სპეციალიზებული ტექნიკის შესასყიდად, ინფრასტრუქტურის მოსაწყობად და თანამედროვე ტექნოლოგიების დანერგვისთვის 63 მილიონი ლარის საწყისი კაპიტალდაბანდებაა გათვალისწინებული (აღნიშნული თანხა 2026 წლის მოქმედ ბიუჯეტში ჯერ ასახული არ არის).

BM.GE წერს, რომ საწყის ეტაპზე ახალი კომპანია გორი-არგვეთას 105-კილომეტრიანი საერთაშორისო ავტომაგისტრალის მართვასა და მოვლა-შენახვაზე იზრუნებს.