ევროკავშირის ელჩის საქართველოში, კარლ ჰარცელის განცხადებით, შეშფოთებულები არიან ექსპრეზიდენტის ჯანმრთელობის მდგომარეობაზე ექიმთა კონსილიუმის ანგარიშით. მისი თქმით, სააკაშვილის ჯანმრთელობაზე პასუხისმგებლობა სახელმწიფოს ეკისრება.

"მე არ მაქვს ბატონი მიხეილ სააკაშვილის ჯანმრთელობის მდგომარეობაზე ინფორმაცია პირველწყაროდან. არც ექიმი ვარ, რომ სწორი შეფასება გავაკეთო. მაგრამ, ჩვენ ძალიან შეშფოთებულები ვართ მის ჯანმრთელობის მდგომარეობაზე გავრცელებული ინფორმაციით, მათ შორისაა, სამედიცინო ექსპერტთა ანგარიში. ჩემთვის და ევროკავშირისთვის გადამწყვეტია, რომ ბატონი სააკაშვილის ფიზიკურ და ფსიქიკურ ჯანმრთელობაზე პასუხისმგებლობა სახელმწიფოს ეკისრება, არა როგორც პოლიტიკური არჩევანის საკითხზე, არამედ როგორც ადამიანის ფუნდამენტური უფლების საკითხზე", — განაცხადა მან.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

გუშინ, 28 აპრილს ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტი აქციები დააანონსა.

ამავე თემაზე: