პრეზიდენტი, სალომე ზურაბიშვილი აცხადებს, რომ არ შეიძლება საუბარი იყოს ომის პარტიაზე და საქართველოში ომის მომხრე არავინ არაა. ზურაბიშვილი, ასევე, აცხადებს, რომ მეორე მხრივ, არ შეიძლება საუბარი მიმდინარეობდეს იმაზე, რომ მიდის გარკვეული ფორმის არასანქცირებული ვაჭრობა.

"არ შეიძლება, რომ იყოს ლაპარაკი რაღაც ომის პარტიაზე საქართველოში. ჩემთვის ეს არ არსებობს. არავინ არ არის ომის მომხრე საქართველოში და მინდა პირადად დავიცვა სახალხო დამცველი, რადგან მიმაჩნია, რომ ეს არის ძალიან მნიშვნელოვანი ინსტიტუტი, პირველ რიგში, როდესაც ჩვენ ვამზადებთ იმ კითხვარზე პასუხებს, რომელიც არის ევროკავშირის კითხვარი და არ შეიძლება ასეთი ბრალდებები.

ასევე, არ შეიძლება, მეორე მხრივ, რომ ვიღაცები საუბრობდნენ იმაზე, რომ საქართველოში სანქციების გვერდის ავლით მიდის რაღაც ფორმის არასანქცირებული ვაჭრობა", — აცხადებს პრეზიდენტი.

მმართველი პარტიის წარმომადგენლები ნაციონალურ მოძრაობას "ომის პარტიას" უწოდებენ.

ქართული ოცნების თავმჯდომარე ირაკლი კობახიძემ 28 აპრილს განაცხადა, რომ ვინც მიხეილ სააკაშვილის გათავისუფლებას ითხოვს, ერთადერთი მიზანი ამოძრავებს — საქართველოს სამხედრო კონფლიქტში ჩათრევა.