უკრაინის სახალხო დამცველის, ლუდმილა დენისოვას განცხადებით, ექსპრეზიდენტ მიხეილ სააკაშვილის მკურნალობის გაჭიანურებამ, შესაძლოა, ფატალური შედეგი გამოიწვიოს. მისი თქმით, ის საზღვარგარეთ მკურნალობას დაუყოვნებლივ საჭიროებს.

"ამის შესახებ სახალხო დამცველთან არსებულმა ალტერნატიულმა სამედიცინო კონსილიუმის ექიმმა, ოთარ თოიძემაც დაადასტურა [...] არაერთხელ აღვნიშნე, რომ მისი მკურნალობის გაგრძელება მულტიფუნქციურ კლინიკაში ან საზღვარგარეთ არის საჭირო", — წერს ის ფეისბუქგვერდზე.

დენისოვა საქართველოს ხელისუფლებას მოუწოდებს, უზრუნველყონ სააკაშვილის ადეკვატური სამედიცინო დახმარება.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

ამავე თემაზე: