ულტიმატუმის ამოწურვის შემდეგ ექსპრეზიდენტის ოჯახი მთელი ქვეყნის მასშტაბით უწყვეტ აქციებს აანონსებს. როგორც სააკაშვილის ძმებმა გამართულ ბრიფინგზე განაცხადეს, ხვალიდან, 3 მაისიდან შეხვედრების გამართვას, მათ შორის, პატრიარქთანაც გეგმავენ.

"ხვალიდან აქტიურად დავიწყებთ საუბარს ყველასთან. პირველ რიგში უნდა ვისაუბროთ ექიმებთან, კიდევ ერთხელ. უნდა ვისაუბროთ საპატრიარქოსთან, გვაქვს ასევე სიგნალები, რომ შეიძლება პატივი დაგვდოს უწმინდესმა, შეგვხვდეს, გამონახოს დრო, რათა მას ავუხსნათ ჩვენი ძმის ჯანმრთელობის მდგომარეობა. იქნებ, მისმა ზეგავლენამ და მისმა ავტორიტეტმა მოახდინოს რამე გავლენა. გავაგრძელებთ შეხვედრებს არასამთავრობო სექტორთან, სამოქალაქო საზოგადოებასთან. უფრო მეტიც, ჩვენ ვაანონსებთ უწყვეტ აქციებს, რომლებსაც ამ შეხვედრების შემდეგ დავიწყებთ, ძალიან აქტიურად. მთელი ქვეყნის მასშტაბით", — თქვეს მათ.

რაც შეეხება აქციების დაწყების თარიღს, როგორც დავით სააკაშვილი ამბობს, ამაზე ინფორმაციას უახლოეს დღეებში წერილობით, ან სოციალური ქსელის საშუალებით გაავრცელებენ.

გიორგი სააკაშვილის განცხადებით, ისინი არა ექსპრეზიდენტის შეწყალებას, არამედ სასჯელის გადავადებას ითხოვენ, რათა მას ადეკვატური სამედიცინო მკურნალობა ჩაუტარდეს.

28 აპრილს ექსპრეზიდენტის ოჯახმა განაცხადა, რომ მთავრობას სააკაშვილის საზღვარგარეთ სამკურნალოდ გადასაყვანად დროს ორშაბათს, 2 მაისამდე აძლევდნენ.

27 აპრილს სახალხო დამცველის ინიციატივით შექმნილი ექიმთა კონსილიუმის წევრმა, ნევროლოგმა, თენგიზ წულაძემ განაცხადა, რომ სააკაშვილს ციხეში ძირითადი მედიკამენტური მკურნალობა უტარდება, თუმცა ეს საკმარისი არაა. ნევროლოგის თქმით, ექსპრეზიდენტი ცილოვანი საკვების მიღებაზე უარს ამბობს, რასაც ცილოვანი შიმშილი მოსდევს. მისივე თქმით, ის ცილები, რომელიც სააკაშვილს არ მიეწოდება, ორგანოებისა და კუნთების დაშლას იწყებს.

20 აპრილს ექსპრეზიდენტი, მიხეილ სააკაშვილი სასამართლო პროცესზე საუბრობდა, როდესაც განაცხადა, რომ შეუძლოდ გახდა და ექიმის დახმარება ითხოვა. მან მანდატურებს დახმარება სთხოვა, რის შემდეგაც დარბაზიდან გაიყვანეს. სააკაშვილი პროცესზე რამდენიმე წუთში დააბრუნეს.

ამავე თემაზე: