ერთიანი ნაციონალური მოძრაობის წევრის, გიორგი ბარამიძის განცხადებაზე სამშობლოს ღალატის მუხლით დაწყებული გამოძიების ფარგლებში კობა ლიკლიკაძე დაიკითხა.

ლიკლიკაძე ამჟამად ვეტერანების საქმეთა სახელმწიფო სამსახურის პროტოკოლისა და საზოგადოებასთან ურთიერთობის სამმართველოს კოორდინატორია. ლიკლიკაძე აფხაზეთის ომის დროს შეიარაღებული ძალების გაერთიანებული პრესცენტრის თანამშრომელი იყო.

ლიკლიკაძემ IPN-თან საუბარში განაცხადა, რომ გიორგი ბარამიძის განცხადება მისთვის მოულოდნელი იყო. მისი განმარტებით, "ასეთ მძიმე წარსულზე ლაპარაკისას ადამიანს შეიძლება ცდომილება მოუვიდეს" და ამის დასადასტურებლად პირადი მაგალითი გაიხსენა. კერძოდ, ლიკლიკაძემ "ტვ პირველის" ეთერში განაცხადა, რომ 2008 წლის 10 აგვისტოს გორის სამხედრო ჰოსპიტალი ექიმებმა დატოვეს და დაჭრილები მიატოვეს — თუმცა, აღნიშნული განცხადებისთვის მან მალევე მოიხადა ბოდიში.

"მისგან, როგორც წარსულში კომპეტენტური სახელმწიფო მოხელისგან, ეს განცხადება სრულიად მოულოდნელი იყო. მან რეალურად იცოდა, რომ მსგავსი რამ იქ არ მომხდარა.
აქ იმისთვის ვარ, რომ, თუ გამოძიებას რაიმე შეკითხვა ექნება, ჩემი კომპეტენციისა და ცოდნის ფარგლებში ვუპასუხო. ასეთ მძიმე წარსულზე ლაპარაკისას ადამიანს შეიძლება ცდომილება მოუვიდეს. ერთ-ერთი ასეთი შემთხვევა ახლახან მეც მომივიდა და იმავე წუთში, როგორც კი დამირეკეს, პირდაპირ და გადაჭრით მოვიხადე ბოდიში ყველას წინაშე, ვინც ჩემი არასწორი შეფასებისა თუ ფაქტის დამახინჯების ადრესატი გახდა. ეს ხდება, ადამიანები ვართ," — განაცხადა ლიკლიკაძემ.

7 აგვისტოს პროკურატურამ იაგო ხვიჩიას საავტორო გადაცემა "საქართველოს დაბადებაში" გიორგი ბარამიძის მიერ აფხაზეთის ომსა და ტყვეთა გაცვლის პროცესზე გაკეთებულ განცხადებასთან დაკავშირებით გამოძიება სახელმწიფო ღალატისა და საბოტაჟის მუხლებით დაიწყო.

ბარამიძემ გადაცემაში განაცხადა, რომ საქართველოს ტყვეები არ ჰყავდა, რადგან მათ ხვრეტდნენ. ბარამიძის განმარტებით, მისი აფხაზეთში ჩასვლის შემდეგ მდგომარეობა შეიცვალა და აღნიშნა, "რომ არ შეცვლილიყო, ისინი ვერ შეძლებდნენ ქართველი 200 ტყვის გაცვლას სეპარატისტულ მხარესთან".

მოგვიანებით ბარამიძემ განაცხადა, რომ მძიმე პროცესების აღწერისას "სხვა სიტყვების გამოყენება აჯობებდა".

ბარამიძემ "რადიო თავისუფლებასთან" საუბარში განმარტა, რომ პროპაგანდისტულმა მედიებმა მისი ნათქვამი არასწორი ინტერპრეტაციით გაავრცელეს. მისი თქმით, სიცრუეა მოსაზრება, თითქოს მან თქვა, რომ საქართველო ტყვეებს აყვანდა და ხვრეტდა.