უკრაინის რადას ინფორმაციით, შალვა პაპუაშვილმა კიევის რეგიონის განადგურებულ ქალაქებში ვიზიტების შემდეგ რუსლან სტეფანაჩუკი დაარწმუნა, რომ საქართველო რუსეთს არანაირად არ დაეხმარება. ამის შესახებ უკრაინის რადა Facebook-ზე წერს.

"ჩვენ ნათლად გვესმის, სად ვართ, რომელ მხარეს და ეს ნათლად გვესმის — ერთ მხარეს უკრაინასთან, ევროკავშირთან, ისევე როგორც მთელ მსოფლიოში", — რადას ცნობით, თქვა პაპუაშვილმა.

როგორც დღეს სტეფანჩუკმა დაწერა, პაპუაშვილთან რუსეთისთვის სანქციების დაწესების აუცილებლობა განიხილა. ის კიევში საპარლამენტო დელეგაციის ჩასვლას მიესალმება და აცხადებს, რომ ეს ვიზიტი კიდევ უფრო გააძლიერებს ორმხრივ ურთიერთობებს უკრაინასა და საქართველოს შორის.

საპარლამენტო დელეგაცია უკრაინაში გუშინ გაემგზავრა. ნაციონალურმა მოძრაობამ ვიზიტში მონაწილეობაზე უარი თქვა. მოწვევის შემდეგ პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.

15 აპრილს პარლამენტის ვიცე-სპიკერმა, გია ვოლსკიმ ნაციონალური მოძრაობა შესაძლო პროვოკაციებში დაადანაშაულა. მისი თქმით, ინფორმაცია უკრაინის სპეცსამსახურებს უკვე მიეწოდათ. ვოლსკი ამბობს, რომ ინფორმაცია სუს-ს "საკმაოდ სარწმუნო წყაროსგან" აქვს. სახელმწიფო უსაფრთხოების სამსახურმა გამოძიება სახელმწიფო-პოლიტიკური თანამდებობის პირზე თავდასხმის მუხლით დაიწყო.