სახელმწიფო უსაფრთხოების სამსახურმა სახელმწიფო-პოლიტიკური თანამდებობის პირზე თავდასხმის მუხლით გამოძიება დაიწყო. როგორც უწყებაში განმარტეს, გამოძიება სისხლის სამართლის კოდექსის 325-ე მუხლით 12 აპრილს დაიწყო და ინფორმაცია უკრაინელ კოლეგებს უკვე მიაწოდეს.

დღეს, 15 აპრილს პარლამენტის ვიცე-სპიკერმა, გია ვოლსკიმ ნაციონალური მოძრაობა შესაძლო პროვოკაციებში დაადანაშაულა. მანაც აღნიშნა, რომ ინფორმაცია უკრაინის სპეცსამსახურებს უკვე მიეწოდათ. ვოლსკი ამბობს, რომ ინფორმაცია სუს-ს "საკმაოდ სარწმუნო წყაროსგან" აქვს.

ამაზე ისაუბრა პაპუაშვილმაც. მისი თქმით, ენმ ვიზიტის ჩაშლას ცდილობდა. კითხვაზე, თუ რას ნიშნავს მძიმე პროვოკაცია, ის შემდეგნაირად პასუხობს:

"ზოგადად, ნაციონალური მოძრაობისგან არაფერია გამორიცხული, მაგრამ ჩვენ მივდივართ იმისთვის, რომ ჩვენს მეგობრებს გვერდში დავუდგეთ".

ამას გამოეხმაურნენ ნაციონალურ მოძრაობაში. პარტიის წევრი, ლევან ბეჟაშვილი ამბობს, რომ "ქართულმა ოცნებამ მიზეზების ძებნას თავი დაანებოს". მისივე თქმით, შესაძლო პროვოკაციებზე განცხადებებს სერიოზულად ვერ აღიქვამს.

"პარლამენტის დელეგაცია უკრაინამ ოფიციალურად მიიწვია, ბუნებრივია, ისინი არიან პასუხისმგებელი და იქნებიან პასუხისმგებელი დელეგაციის უსაფრთხოებაზე. ამიტომ, ახლა ეს განცხადება უფრო მიზეზების ძებნას და თავის არიდების მცდელობას უფრო ჰგავს", — თქვა მან.

საპარლამენტო დელეგაცია უკრაინაში დღეს მიემგზავრება. ნაციონალურმა მოძრაობამ ვიზიტში მონაწილეობაზე უარი თქვა. უკრაინაში ქართული დელეგაციის ვიზიტი თავიდანვე პრობლემური საკითხი იყო. პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.