სტამბოლის შვიდსართულიანი საცხოვრებელი კორპუსის ნაწილის ჩამონგრევის შედეგად 2 ადამიანი დაიღუპა, 10 კი მაშველებმა ნანგრევებიდან გამოიყვანეს. სამაშველო სამუშაოები გრძელდება. ადგილობრივი მედიის ცნობით, მაშველები კიდევ ორ ადამიანს ეძებენ.

სახლის ჩამონგრევის ზუსტი მიზეზი ჯერჯერობით უცნობია. შემთხვევის შესახებ ადგილობრივმა ხელისუფლებამ დაახლოებით 05:40 საათზე მიიღო ინფორმაცია, რის შემდეგაც ადგილზე საგანგებო სამსახურები მივიდნენ.

მაშველებმა, სამძებრო ძაღლების გამოყენებით, ნანგრევებიდან ცოცხლად გამოიყვანეს ოთხი ადამიანი, მათ შორის ორი ბავშვი. ისინი სასწრაფო დახმარების ბრიგადებმა საავადმყოფოებში გადაიყვანეს. შენობის პირველ სართულზე მდებარე ტექსტილის საამქრო ცარიელი აღმოჩნდა.

სამაშველო სამუშაოებში დასახმარებლად ახლომდებარე მუნიციპალიტეტებიდან მძიმე ტექნიკაც მიიყვანეს.

სტამბოლის გუბერნატორის, დავუთ გიულის განცხადებით, ნანგრევებიდან გამოყვანილ არცერთ ადამიანს სიცოცხლისთვის საშიში დაზიანებები არ აღენიშნება. ჩამონგრევის მიზეზის დასადგენად გამოძიება დაიწყო.