პარლამენტის ჯანდაცვის კომიტეტის სხდომაზე, სადაც ფინანსთა მინისტრის მოადგილემ გიორგი კაკაურიძემ 2027 წლის ბიუჯეტის პროექტი წარადგინა, კომიტეტის თავმჯდომარემ ზაზა ლომინაძემ ყურადღება მომავალი წლისთვის პენსიების ზრდის მნიშვნელობაზე გაამახვილა.

მან კაკაურიძეს 60-70 წლის ასაკის პენსიონერებისთვის პენსიის 20-ის ნაცვლად 30 ლარით მატების ინიციატივით მიმართა. როგორც ზაზა ლომინაძემ განაცხადა, თუკი საჯარო მოხელეებისთვის ხელფასების 8.4%-იანი მატება იგეგმება, სასურველია, პენსიონერებისთვისაც მსგავსი ზრდა იყოს.

"60-დან 70 წლამდე ასაკის ადამიანებისთვის პენსია მხოლოდ 20 ლარით იმატებს, რაც პრაქტიკულად არსებული პენსიის 5,4%-ია. ჩვენი კომიტეტის ყველა წევრის სახელით გეტყვით, რომ სასურველი იქნება, მინიმუმ 30 ლარით მოხდეს მატება და მინიმალური პენსია ქვეყანაში იყოს 400 ლარით განსაზღვრული.

ჩვენ გვესმის, რომ თქვენ არაერთხელ ბრძანეთ, რომ პენსიის 10 ლარით მომატება ნიშნავს ბიუჯეტის 100 მილიონ ლარს, ეს ძალიან დიდი მოცულობაა. მაგრამ თქვენ შეძელით და გამოძებნეთ 20 ლარი 70 წლამდე პენსიონერებისთვის – არა მაღალმთიან რეგიონებში ვგულისხმობ – და 60 ლარი — 70 წელს გადაცილებული მოქალაქეებისთვის, რაც მართლაც მნიშვნელოვანია.

მაგრამ თუკი ჩვენ ვახერხებთ და 8,4%-ით ვზრდით სახელმწიფო მოხელეების ხელფასს, ალბათ 5,4%-იანი საპენსიო მინიმალური მატება არ არის საკმარისი და თუკი ჩვენ შევძლებთ და 30 ლარს დავუმატებთ, ეს პრაქტიკულად იქნება დაახლოებით იგივე ციფრებამდე მომატება", — მიმართა გიორგი კაკაურიძეს ზაზა ლომინაძემ.

როგორც პასუხად ფინანსთა მინისტრის მოადგილემ გიორგი კაკაურიძემ განაცხადა, პენსიონერთა რაოდენობა მზარდია, ამიტომაც საჭიროა, ერთი მხრივ, სოციალური და მეორე მხრივ, ფისკალური მიმართულებით სწორი პოლიტიკა.

"პენსიონერთა რაოდენობა მნიშვნელოვნად იზრდება. ბოლო ათ წელიწადში დაახლოებით 200 000-ით არის პენსიონერთა რაოდენობა გაზრდილი. მომდევნო წელს დაახლოებით 30 000-ით კიდევ გაიზარდება. ახლა პენსიონერთა რაოდენობა 902 000 იყო, მომდევნო წლის ბოლოს 930 000 მაინც იქნება. ეს მზარდია და რომ არაფერი ვქნათ, პენსიის ხარჯი მაინც გაიზარდება. ამიტომ ფისკალურად მდგრად მოდელზე უნდა წავიდეთ... მზად ვართ ვიმუშაოთ, სწორად უნდა ჩამოვაყალიბოთ, რომ ერთი მხრივ, სოციალური მიმართულებით სწორი პოლიტიკა იყოს და მეორე მხრივ, იყოს ფისკალურად შენარჩუნებადი", — განაცხადა გიორგი კაკაურიძემ.

ცნობისთვის, 2027 წლის ბიუჯეტის პროექტის მიხედვით, 60-70 წლის ადამიანებისთვის პენსია 20 ლარით, ხოლო 70 წელს გადაცილებულებისთვის 60 ლარით იზრდება.