პარლამენტის ვიცე-სპიკერის გია ვოლსკის ამტკიცებს, რომ ნაციონალური მოძრაობის წევრები საპარლამენტო დელეგაციის იმის გამო არ უერთდებიან, რომ "გარკვეულ პროვოკაციებს" გეგმავენ. ის ამბობს, რომ ინფორმაცია "საკმაოდ სარწმუნო წყარომ" მიაწოდა სპეციალურ სამსახურს.

"ინფორმაცია არის, რომ სწორედაც გარკვეული პროვოკაციის დაგეგმვის მიზნით არიან მობილიზებულები და სწორედ ეს არის მთავარი მიზეზი იმისა, რომ რატომ არ არიან ისინი დელეგაციაში. უფრო მეტსაც გეტყვით, აღნიშნულთან დაკავშირებით საკმაოდ სარწმუნო წყაროდან მიიღო ინფორმაცია ჩვენმა სპეციალურმა სამსახურებმა და უკვე გაუზიარეს უკრაინის სპეცსამსახურებს. დარწმუნებული ვარ, უკრაინელები ამასთან დაკავშირებით მიიღებენ შესაბამის ზომებს და ვიზიტს ხელი არ შეეშლება", — ამბობს ვოლსკი.

საპარლამენტო დელეგაცია უკრაინაში დღეს მიემგზავრება. როგორც ცნობილია დელეგაციაში არის ყველა პოლიტიკური პარტიის წარმომადგენელი. ნაციონალურმა მოძრაობამ უარი თქვა მმართველ გუნდთან ერთად ვიზიტზე.