საქართველოს პარლამენტის განცხადებით, პარლამენტის თავმჯდომარეს, შალვა პაპუაშვილს ონლაინშეხვედრა ჰქონდა უკრაინელ კოლეგასთან, რუსლან სტეფანჩუკთან და შეთანხმდნენ, რომ გაუგებრობების ასარიდებლად მნიშვნელოვანია წინასწარი კომუნიკაცია. ამასთანავე მხარეები შეთანხმდნენ უახლოეს დღეებში პაპუაშვილის ვიზიტზე უკრაინაში.

პარლამენტის ცნობით, სტეფანჩუკმა და პაპუაშვილმა განიხილეს უკრაინის წინააღმდეგ მიმდინარე რუსული აგრესია და მისი ტრაგიკული შედეგები, ასევე, ისაუბრეს ევროკავშირში გაწევრიანების პროცესში საქართველოსა და უკრაინის თანამშრომლობის და გამოცდილების გაზიარების შესაძლებლობაზე.

პაპუაშვილის განცხადებით, ქართული ოცნების წევრები შეთანხმდნენ, რომ უხერხულობისა და გაუგებრობის მოსაგვარებლად მისი უკრაინაში ვიზიტი მნიშვნელოვან როლს შეასრულებს. მისივე თქმით, უკვე ჰქონდა კომუნიკაცია რადას თავმჯდომარესთან და დაუდასტურა უკრაინაში ვიზიტისთვის მზაობა.

8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა უკრაინის რადას თავმჯდომარემ კოლეგას.

გუშინ კი სტეფანჩუკმა განაცხადა, რომ დღეს პაპუაშვილთან ოფიციალური ზარი ექნება და კიდევ ერთხელ დაუდასტურებს მოწვევას.

ამავე თემაზე: