ამერიკის შეერთებული შტატების ელჩის საქართველოში, კელი დეგნანის შეფასებით, ძალიან მნიშვნელოვანია, რომ უკრაინაში საქართველოდან მრავალპარტიული დელეგაცია გაემგზავრება.

"ეს კარგად ასახავს ქართველი ხალხის დამოკიდებულებას და იმ მხარდაჭერას, რაც ქართველ ხალხს აქვს უკრაინის სახელმწიფოს, მისი სუვერენიტეტისა და ტერიტორიული მთლიანობის მიმართ. ეს ძალიან პოზიტიური ნიშანია, როგორც უკვე აღვნიშნე. მიხარია, რომ პოზიტიური საუბარი იყო საქართველოს პარლამენტის სპიკერსა და უკრაინის რადას სპიკერს შორის", — განაცხადა მან.

დეგნანი ხაზს უსვამს, რომ უკრაინასა და საქართველოს შორის არსებული ნებისმიერი დაპირისპირებით მხოლოდ და მხოლოდ რუსეთი იღებს სარგებელს. ელჩი აღნიშნავს, რომ ძალიან კარგია, როდესაც გარკვეული გაუგებრობის დროს საკითხები პირისპირ წყდება.

"ძალიან მნიშვნელოვანია ერთიანობის მესიჯი, იმისა, რომ ყველანი ერთად ვიდგებით და რომ ყველასთვის ძალის გამოყენებით ქვეყანაში შეჭრა, მისი დაბომბვა, მშვიდობიანი მოქალაქეების მკვლელობა მიუღებელია", — თქვა დეგნანმა.

საქართველოდან საპარლამენტო დელეგაცია უკრაინაში დღეს მიემგზავრება. ნაციონალურმა მოძრაობამ ვიზიტში მონაწილეობაზე უარი თქვა. მოწვევის შემდეგ პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.

დღეს, 15 აპრილს პარლამენტის ვიცე-სპიკერმა, გია ვოლსკიმ ნაციონალური მოძრაობა შესაძლო პროვოკაციებში დაადანაშაულა. მისი თქმით, ინფორმაცია უკრაინის სპეცსამსახურებს უკვე მიეწოდათ. ვოლსკი ამბობს, რომ ინფორმაცია სუს-ს "საკმაოდ სარწმუნო წყაროსგან" აქვს. სახელმწიფო უსაფრთხოების სამსახურმა გამოძიება სახელმწიფო-პოლიტიკური თანამდებობის პირზე თავდასხმის მუხლით დაიწყო.