აზოვის ბატალიონი იუწყება, რომ რუსეთმა მარიუპოლში მომწამვლელი ნივთიერება გამოიყენა, თუმცა ტოქსიკოლოგიური ანალიზი შეუძლებელია.

"ახლა ნათელია, რომ მტერმა გამოიყენა მომწამვლელი ნივთიერება ან ძლიერი მომწამვლელი ნივთიერება, ძირითადად მახრჩობელა. მათი ტოქსიკოლოგიური ანალიზი შეუძლებელია. ამავე დროს, მთავარი ამოცანაა პერსონალის მდგომარეობისა და მოწამვლის შესაძლო შედეგების კონტროლი", — წერს ბატალიონი ტვიტერზე.

მათივე თქმით, დაზარალებულთა მდგომარეობა დამაკმაყოფილებელია. აზოვის ბატალიონის განცხადებით, ხალხის კონტაქტი ნივთიერებასთან მინიმალური იყო, რადგან მათი მდებარეობიდან გარკვეულ მანძილზე იყო ეპიცენტრი.

გუშინ, 11 აპრილს აზოვის ბატალიონმა განაცხადა, რომ რუსეთის საოკუპაციო ძალებმა მარიუპოლში უკრაინელი სამხედროებისა და მშვიდობიანი მოქალაქეების წინააღმდეგ გაურკვეველი წარმომავლობის მომწამვლელი ნივთიერება გამოიყენეს. მათი თქმით, ნივთიერება რუსებმა უპილოტო საფრენი აპარატიდან ჩამოაგდეს. დაზარალებულებს აღენიშნებათ სუნთქვის უკმარისობა. აზოვის ბატალიონის ცნობით, ნივთიერების გამოყენების შედეგები ზუსტდება.

უკრაინსკა პრავდას განცხადებით, თავდაცვის სამინისტროსთან დაახლოებულმა წყარომ მათ უთხრა, რომ რუსი ოკუპანტების მიერ ქიმიური იარაღის გამოყენების ალბათობა ძალიან მაღალია.