დუეინ დევისი ნაფიც მსაჯულთა სასამართლომ თუფაქ შაკურის მკვლელობის ორგანიზებაში დამნაშავედ ცნო.

კვირების განმავლობაში მიმდინარე სასამართლო პროცესის შემდეგ, ნაფიცმა მსაჯულებმა გადაწყვეტილების მისაღებად დაახლოებით სამი საათი იმსჯელეს.

პროკურატურის მტკიცებით, დევისმა 1996 წლის 7 სექტემბერს, ლას-ვეგასში, თუფაქ შაკურის მკვლელობა დაგეგმა და მკვლელობის იარაღი უშუალოდ მსროლელს გადასცა. გამოძიების ვერსიით, მსროლელი ან დევისის დისშვილი, ორლანდო ანდერსონი, ან მანქანის უკანა სავარძელზე მყოფი მეორე კაცი იყო.

დასკვნით სიტყვაში პროკურორმა ბინუ პალალმა განაცხადა, რომ საქმე სავსეა მტკიცებულებებითა და მოწმეთა ჩვენებებით, რომლებიც ემთხვევა დევისის მიერ წლების განმავლობაში გაკეთებულ განცხადებებს:

"თითქმის 18 წლის განმავლობაში დუეინ დევისი პოლიციასთან, ტელევიზიაში, წიგნებსა თუ YouTube-ის ინტერვიუებში — ყველგან, სადაც უსმენდნენ, ამბობდა, რომ ის პასუხისმგებელია თუფაქ შაკურის მკვლელობაზე. დაანახეთ, რომ გესმით მისი და ცანით დამნაშავედ".

ამავდროულად, დევისის ადვოკატი, მაიკლ სანფტი ამტკიცებდა, რომ დევისის წინააღმდეგ ერთადერთი მტკიცებულება თავად მისი აღიარებებია, რაც რეალურ მტკიცებულებას არ წარმოადგენს.

ფოტო: ABC

დევისის განაჩენი 13 ოქტომბრისთვის უნდა გამოცხადდეს, მანამდე კი პატიმრობაში გირაოს უფლების გარეშე დატოვებენ. დევისმა განაცხადა, რომ განაჩენის გამოტანის შემდეგ მის გასაჩივრებას აპირებს.

2019 წელს დევისმა გამოუშვება მემუარები — Compton Street Legend (კომპტონის ქუჩის ლეგენდა). წიგნის შესავალში ეწერა: "მე თუფაქის მკვლელობის ერთადერთი ცოცხალი მოწმე ვარ", შემდეგ კი დუეინი შაკურის მკვლელობის ღამეს დეტალურად აღწერდა.