მნიშვნელობა არ აქვს, სად ატარებ ზაფხულს და რამდენად მდიდრულად ისვენებ — შვებულებაში მოლხენით მაინც ძნელად თუ გაუტოლდები ლეგენდარულ ლუჩანო პავაროტის. ფოტოები, რომლებსაც ქვემოთ იხილავთ, გიჩვენებთ იტალიელი ტენორის ცხოვრების სულ სხვა მხარეს, სადაც პავაროტი სმოკინგებისა და ბაფთა-ჰალსტუხების ნაცვლად ყვავილებიან საზაფხულო პერანგებსა და მოკლე შორტებშია გამოწყობილი...

1975 წელს, თავის მეორმოცე იუბილეზე, პავაროტიმ ადრიატიკის ზღვის სანაპიროზე საზაფხულო აგარაკი შეიძინა. ქალაქ პეზაროს მახლობლად მდებარე ძველი კოტეჯი — ვილა ჯულია, როგორც მას უწოდებდნენ — იმ პერიოდში უკვე აღიარებული საოპერო ვარსკვლავისთვის მაინცდამაინც შესაფერისად ვერ ჩაითვლებოდა, მაგრამ პავაროტის ადგილი განსაკუთრებულად შეუყვარდა. ეს მზიანი მხარე სუპერვარსკვლავის დამღლელი და გადატვირთული ცხოვრებისგან გასარიდებლად ზედგამოჭრილი მშვიდი ნავსაყუდელი გამოდგა.

ფოტო: Getty Images

ვილა ჯულიაში პავაროტის გატარებული ზაფხულების ამსახველი ფოტოები ძველი იტალიური ფილმიდან ამოღებული კადრები გეგონება. ოპერის ვარსკვლავი ხან მაყალზე ამზადებდა საჭმელს, ხან ხატავდა, ხან დიდ აუზში ჭყუმპალაობდა და ხანაც სკუტერით დაქროდა თავის ცოლთან ერთად.

სხვათა შორის, სწორედ ვილა ჯულიადან გავრცელდა ასევე პირველი პაპარაცული ფოტოები, რომლებზეც პავაროტისა და მისი პირადი ასისტენტის, ნიკოლეტა მანტოვანის, რომანტიკული ურთიერთობა იყო ასახული. მოგვიანებით, 2003 წელს, მანტოვანი ტენორის მეორე ცოლი გახდა, მაგრამ წყვილის ურთიერთობა ხანმოკლე აღმოჩნდა — პავაროტის პანკრეასის კიბოს დიაგნოზი დაუსვეს და 2007 წელს იგი გარდაიცვალა.

ვილა ჯულია დღეს უკვე მსურველებზე ქირავდება.