ამერიკელი მილიარდერი ილონ მასკი მზად არის, უკრაინას რუსეთის ტერიტორიაზე დარტყმებისთვის Starlink-ით აღჭურვილი დრონების გამოყენების უფლება მისცეს, — ამის შესახებ Financial Times წერს.

მათი ცნობით, ამის შესახებ SpaceX-ის ხელმძღვანელმა უკრაინის თავდაცვის ყოფილ მინისტრ მიხაილო ფიოდოროვთან საუბრისას განაცხადა.

თუმცა, მასკმა ხაზი გაუსვა, რომ ეს არის "პოლიტიკური გადაწყვეტილება, რომელიც თეთრმა სახლმა უნდა მიიღოს", — განუცხადეს წყაროებმა FT-ს.

ფიოდოროვმა გამოცემას უარი უთხრა მასკთან საუბრის დეტალების გამხელაზე. პუბლიკაციაში არ არის დაზუსტებული, როდის და რა ვითარებაში შედგა მათი საუბარი. მასკს და მის კომპანია SpaceX-ს FT-ის შეკითხვებზე კომენტარი არ გაუკეთებიათ.

გამოცემასთან ინტერვიუში ფიოდოროვმა განაცხადა, რომ რუსეთის ტერიტორიაზე უკრაინის მიერ შორ მანძილზე განხორციელებული დარტყმების გაძლიერება ყველაზე რეალური გზაა რუსეთის პრეზიდენტ ვლადიმირ პუტინზე ზეწოლის მოსახდენად და მისთვის ომის შეწყვეტის იძულებისთვის.

მისივე თქმით, ასეთი დარტყმებისთვის გამოყენებულ შეიარაღებაში დამატებითი ინვესტიციებია საჭირო: "ჩვენ გვჭირდება მეტი რეაქტიული დრონი, გვჭირდება იაფი რაკეტები, გვჭირდება ხელოვნური ინტელექტით მართვადი რაკეტები. პუტინთან სხვა დიალოგის წარმართვა შეუძლებელია. მას მხოლოდ ძალის ესმის".

FT იმასაც წერს, რომ მიხაილო ფიოდოროვი ამჟამად ვიზიტით აშშ-ში იმყოფება, სადაც უკრაინის თავდაცვითი ტექნოლოგიების ფონდისთვის ინვესტიციების მოძიებას გეგმავს.

ერთი კვირით ადრე Financial Times-მა გაავრცელა ინფორმაცია, რომ აშშ-ის პრეზიდენტმა დონალდ ტრამპმა არ დაუჭირა მხარი უკრაინის თხოვნას, რუსეთის წინააღმდეგ დარტყმებისთვის Starlink-ის გამოყენების შესახებ.

აგვისტოს დასაწყისში ამერიკული გამოცემა The Atlantic-იც წყაროებზე დაყრდნობით წერდა, რომ ილონ მასკმა უარი თქვა უკრაინისთვის Starlink-ის გამოყენების შესაძლებლობის მიცემაზე, რათა უკრაინას რუსეთის სიღრმეში განთავსებულ სარაკეტო გამშვებ დანადგარებზე დარტყმები განეხორციელებინა.

მიუხედავად ამისა, 26 აგვისტოს უკრაინის პრეზიდენტმა ვოლოდიმირ ზელენსკიმ ხელი მოაწერა განკარგულებას, რომლის თანახმადაც მილიარდერს თავისუფლების ორდენი გადაეცა "ადამიანთა სიცოცხლისა და თავისუფლების დაცვაში შეტანილი განსაკუთრებული პირადი წვლილისა და უკრაინისა და ამერიკის შეერთებულ შტატებს შორის ურთიერთობების განვითარებისთვის".