ქართული ოცნების თავმჯდომარე, ირაკლი კობახიძე აცხადებს, რომ უმაღლეს საპარალამენტო დონეზეც არსებობს "ზოგადი მზაობა" უკრაინაში ვიზიტთან დაკავშირებით, თუმცა ამაზე "მკაფიო წინაპირობებია". ამის შესახებ კობახიძემ პარტიაში გამართულ ბრიფინგზე ისაუბრა.

"დღეს ჩვენ გავახმოვანეთ უკვე მიღებული გადაწყვეტილება იმის თაობაზე, რომ საპარლამენტო უმრავლესობის წარმომადგენლები განახორციელებენ ვიზიტს უკრაინაში. რაც შეეხება შემადგენლობას, ამასთან დაკავშირებით მოგვიანებით გახდება ცნობილი, ამაზეც იყო უკვე, რა თქმა უნდა, წინასწარი კონსულტაციები. ასევე, ზოგადი მზაობა, რომ უმაღლეს დონეზე, უმაღლეს საპარლამენტო დონეზეც შედგეს ვიზიტი არსებობს, თუმცა აქ არის, ბუნებრივია, ძალიან მკაფიო წინაპირობები", — აღნიშნა მან.

კობახიძემ ჩამოთვალა ეს "წინაპირობები" და თქვა, რომ ბოლო პერიოდში უკრაინის ხელისუფლების მხრიდან საქართველოს მიმართ რამდენიმე "შეურაცხმყოფელი" ნაბიჯი გადაიდგა. მისი განცხადებით, მათ შორის, ეს ეხება ელჩის გაწვევასა და ბრალდებებს კონტრაბანდაზე.

"ეს უკავშირდებოდა იგივე ელჩის გაწვევის საკითხს — ჯერ იყო კონსულტაციებზე გაწვეული, შემდეგ თანამდებობიდან გათავისუფლდა უკრაინის ელჩი საქართველოში. დღემდე უკრაინა რჩება დემარშის მდგომარეობაში საქართველოს მიმართ, ასე გამოდის. ყოველ შემთხვევაში, ამის შემდეგ რაიმე განსხვავებული ნაბიჯი უკრაინის ხელისუფლების მხრიდან ჩვენ არ გვინახავს. ეს ვითარება არის შესაცვლელი. ეს არის ერთი და ძალიან პრინციპული საკითხი.

მეორე, ჩვენ მოვისმინეთ ბრალდება კონტრაბანდასთან დაკავშირებით, შემდეგ, შერბილებული განცხადებებიც მოვისმინეთ, თუმცა დაგვეთანხმებით, რომ ეს არ არის საკმარისი. როცა ასეთი ბრალდება მოდის უკრაინის ხელისუფლების მხრიდან, ამას სჭირდება სათანადო ან დადასტურება ან უარყოფა, რაც ჩვენ არ მოგვისმენია, შესაბამისად, ეს საკითხიც რჩება აქტუალური.

მესამე და ალბათ, ყველაზე პრინციპული საკითხი, რადგან ჩვენ გვგონია, რომ ამ ყველა პრობლემის სათავე, ცრუ ბრალდებების, ელჩის გაწვევის სათავე არის ის, რომ დღემდე ადამიანები, რომლებიც არიან საქართველოში რადიკალური ოპოზიციის ლიდერები, არიან უკრაინის ხელისუფლებაში მაღალ დონეზე წარმოდგენილები", — თქვა მან.

მისი თქმით, ეს ადამიანები არიან მიხეილ სააკაშვილი, ზურაბ ადეიშვილი, გია ლორთქიფანიძე და დავით არახამია. კობახიძემ აღნიშნა, რომ ეს არის მდგომარეობა, რომელსაც ცვლილება სჭირდება და როდესაც ამ მხრივ პროგრესს დაინახავენ, უმაღლესი საპარლამენტო დონის ვიზიტზეც იფიქრებენ.

8 აპრილს საქართველოში უკრაინის საქმეთა დროებითი რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევს, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს".

პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია. პაპუაშვილი ამტკიცებს, რომ ამ ვალს ყველა შემთხვევაში შეასრულებენ, "რაც უნდა უსამართლო და უსაფუძვლო ბრალდებები" ესმოდეთ პასუხად.

ამავე თემაზე: